Zend-Kerîm Hân vefâtından sonra daʿvâ-yı istibdâd ve istiklâl ile kemîn-gâh-ı fırsatda rû-pûş-i istitâr olan hânân-ı İran her biri başka başka (175-b) izhâr-ı tâb ü tevân ve «menem diğer nîst» tafralarıyla câlis-i taht-ı keyân ve mâlik-i ezimme-i hall ü akd-i İrâniyân olmak vâdilerinde yek-diğer ile mukātele ve mehâreşe ve mücâdele ve münâveşe edüp âhirü'l-emr Alî-Murad Hân sâhib-i taʿayyün ve vücûd olan hânların ekserîsini tahvîf ve tedmîr ve taht-gâh-ı şâh olan İsfahan ve muzâfâtını zabt u teshîr ve gerden-keşân-ı etrâfı taht-ı rıbka-i itāʿat ve inkıyâda idhâl zımnında şeb ü rûz fikr ü tedbîr eyler iken Tahran ile İsfahan beyninde nâ-gâh maraz-ı hâil hâlini tebâh ve illet-i asîrü'd-devâ dâmen-i ömrünü kûtâh edüp sayyâd-ı ecel saʿve-i hayâtını sayd ve merkūmu kâr u bâr-ı dünyâdan rüste-i kayd eylediği ve mezbûrun hâlet-i marazı li-ümmin birâderi olan Cafer Hân'a mukaddemce ihbâr olduğuna binâen İsfahan'da müddehir ve mevcûd olan nefâis-i emvâl ü eşyâsı gāret-zede-i mütegallibân-ı zamân ve yağma-şüde-i serkeşân-ı İraniyân olmamak mülâhazasıyla İsfahan'a âzim olduğu Baban ve Köy sancakları mutasarrıfı İbrâhîm Paşa ve Derne ve Baclan mutasarrıfı Abdülkādir Paşa taraflarından lede't-tahkīk Bağdad ve Basra vâlisi Vezîr Süleyman Paşa'ya tahrîr ve tenmîk olduğu ve mezbûrun helâki İran hânlarının maʿlûmları oldukda her biri merkūmun câ-nişîni ve belki İran'ın sâhib-i tâc ü nigîni olmağa hâhişger (176-a) ve bu mülâbese ile miyânelerinde harb ü sitîz lâ-muhâle kâr-ger olacağından başka hümâ-yı devlet ve izzet bir bahtiyâr-ı zûrmendin başına konmağa ve kû-yi murâdı savlecân-ı ikbâl ile meydân-ı ümîdden almağa vakt ü zamân lâzım ve belki katı çok eşhâs-ı gammaz helâk ü bevâre muktehim olacağı ve el'ân İran'da müstakill fi'l-umûr eğerçi bir merd-i muʿayyen ve sâhib-rûz olmayup ancak Azerbaycan hânları el-hâletü-hâzihi müteneffis ve muktedir olduklarından gayri tâife-i Zendîyeden Irak-ı Acem'de müteveffâ Ali Murâd Hân'ın birâderi Mehmed Cafer Hân ve Fâris'de Şirâz hânı ve Bahtiyârî taraflarında serdarlık ünvânıyla nâmver olan Şah Murad Hân ve Mâzenderan'da Kaçar Mehmed Hasan Hân dahi zevât-ı müteşahhısadan olmalarıyla Ali Murâd Hân'ın vefâtından sonra bunlar el-yevm ne hâlde oldukları maʿlûm olmayup bundan sonra vukūʿ bulan havâdis-i İraniyye nev be-nev istirâk ve arz olunacağı zemîninde vezîr-i müşârun-ileyhin der-i devlet-medâra tahrîrâtı vürûd edüp hâmil-i tahrîrât olan tatara huzûr-ı kāimimakām-ı âlî-makāmda ilbâs-ı hilʿat buyuruldu.