Sâbıkā mesned-nişîn-i hükûmet belde-i tayyibe-i Kostantaniyye olup hâlâ Şeyhülislâm (176-b) ve müftilenâm-ı sellemehü'l-melikü'l-allâm hazretlerinin semere-i fu'âd ve gusn-ı devha-i zât-ı asâlet-nihâdları olan Elhâc Mustafa Bey-efendi hazretlerinin bundan akdem fî-kulûbihim maraz olan baʿzı ehl-i garaz siʿâyeti ile bî-vakt ü ibbân hükûmet-i İstanbul'dan infisâl ile muidd ü tarîk oldukları nümâyân olup mâ-hâzâ hükûmetleri hilâlinde umûr-ı esnâfa kemâ-yenbagī nizâm ve ahvâl-i esʿârı taʿdîl ve tesviye ile şehriyâr-ı Dârâ-gulâm'a sagīr ü kebîr ve ganî ve fakīrden edʿiyye-i hayriyye tahsil edüp beyne'l-hass ve'l-âm mergûb-i benâm ve mu'teber ü memdûh-i enâm olduğu sübût-yâfte-i tahakkuk ve iştihâr ve nezd-i ferd-i mülûkânede dahi lede'l-ihtiyâr bu keyfiyyet zâhir ve âşikâr olmağla seng-i isâ'et-i ehl-i gavâyet ile münkesir olan zücâc-ı mizâc-ı sadâkat-imtizâcları dest-yârî-i iltifât ile mülte'im ve mir'at-i hâtırlarında nişeste olan gubâr-ı renciş ü âzâr saykal-ı nevâziş ü iʿtibâr ile münʿadim kılınmak hususu hikmet-i bîn-i mezâyâ-yi ahvâl-i ehl-i yakîn ve merâtib-şinas-ı ulemâ-yi dîn olan halîfetu'l-lah fî'l-arzîn hazretlerinin çokdan berü zamîr-i ilhâm-tahmîr-i mülûkânelerinde müstetir ve münketim olduğuna binâen bu hılâl-i meyâmin-ittisâlde mîr-i müşârün-ileyh hazretleri hakkında bahr-i zahhar-ı mekârim-i mülûkâne ve deryâ-yi bî-ka'r u kenâr merahim-i dâverâne (177-a) mevc-endâz-ı zuhûr ve beyaz üzerine şeref-sudûr olan hatt-ı hümâyûn-ı mevahib-nümûn mûcibince Anadolu sadâreti pâyesi ihsâniyle kalb-i münkesiri mecbûr kılınup menâsıb-ı aliyye-i ilmiyye ve merâtib ü iʿtibârât-ı tarîkiyye mukaddemce taraf-ı vâzıhü'ş-şeref-i hazret-i fetvâ-penâhîden işaret ve mûcibince Bâbıâlî'den telhîs ve baʿdehû hatt-ı hümâyûn keşîde kılınmak resm-i pîşîn ve âdet-i dîrîn iken mahzâ müşârün-ileyh hazretlerine ikrâm ve iltifat kasdiyle ve mukaddemâ bila-sebeb çeşîde olduğu zehrâbe-i keder ü melâli izâle dâiyesiyle bu âna dek bir ferd-i müteʿayyin ve sahib-vücûd hakkında sudûr misli gayr-i mesbûk ve maʿdûm ve neyl ü vusûlüne her bir zât-ı mütehayyiz ve mütemeyyizin dağ-ber-dil-i hasret ve iştiyâk olduğu ma'lûm ve meczûm olan sâlifü'l-beyân lûtf-i bî-gāye-i mülûkâne ve nevâziş-i mâlâ-nihâye-i tâcdârânenin müşârün-ileyh hazretleri hakkında peyveste-i mevki-i zuhûr u sünûh ve levha-tırâz-ı sâhîfe-i şuhûd u vuzûh olması hak budur, gıbta-fermâ-yi zümre-i ulemâ ve reşk-âver-i sükkân-ı basît-i gabrâ olmağa lâyık ve sezâ bir keyfiyyet olup ancak zât-ı Mekkiyyü's-simâtlarına münhasır ve mahsûs ve gayriler haklarında adem-i zuhûru müsbet ve mansûs bir latīfe-i gaybiyye ve inâyet-i seniyye-i mülûkiyye olduğu ke'ş-şems fî'l-hevâcir zâhirdir.