Müşârün-ileyh hakkında sebeb-i hafî ile tabʿ-ı mekârim-nebʿ-i mülûkâne mütegayyir ve sadr-ı sâbık tarafından nihânî iʿânet ve himâyet ile şimdiye dek mütekeddir olmayup hattâ sadr-ı sâbık vaktinde müşârün-ileyhe eyâlet-i Bosna tevcîh olunmuşiken iki günden sonra Eğriboz'a tahvîli hakkında adem-i teveccüh iğbirâr-ı tâcdârînin kavî delîli olup binâen-alâ-zâlik sadr-ı sâbıkın azli günü müşârün-ileyhin vezâreti refʿ ve Lefkoşe'ye nefy ü iclâ ve yanında mevcûd olan emvâl ve eşyâsının kabzıyçün Dergâh-ı âlî kapucu-başılarından Osman Ağa ve menfâsına îsâl içün gedüklülerinden Feyzi Ağa me'mûriyyetle yevm-i mezkûrda ihrâc ve isrâ olunduklarından gayri Âsitâne-i saʿâdet'de olan hânesiyle Kuzguncuk'daki yalısı temhîr olunup münhâl olan Eğriboz sancağı Livadyalı Vezîr Hasan Paşa'ya tevcîh olundu. Birkaç günden sonra taraf-ı mülûkâneden müşârün-ileyhin evlâd u iyâline merhamet olunup konak ve yalıda olan emvâl ve eşyâsı sadaka ve inâyet "velâ teziru vâziratün vizra ukhrâ" medlûl-i şerîfine riʿâyet olundu