Zikr olunan Cidde mansıbı bundan akdem bâ-rütbe-i vâlâ-yi vezâret müşârün-ileyh El-hâc Mustafa Paşa'ya tevcîh ve Şam'da kapusunu tanzîm edüp hüccâc ile mansıbı cânibine azîmet etmesi bundan akdem emr ü tenbîh olunmuşidi. Müşârün-ileyh bir-iki seneden berü Erzurum taraflarında umûr-ı serhaddâta nezâret ünvâniyle ikāmet ve mükteseb ve müddaharı ne ise havâyic-i zarûriyyesine sarf ile ifrâğ-ı enbân-ı servet eylediği hâlde masârif-i kesîreyi müstelzim olan Cidde mansıbı tarafına tevcîh olunduğu maʿlûmu oldukda an-asıl haml-i sakīl-i vezâreti tahammülden aczini izhâr ve adem-i teveccühünü her bâr mütemennî ve hâst-gâr iken bi'l-bedâhe zuhûrunu mukadderât-ı ilâhiyyeye haml ile irâet-i sûret-i teslîm ve rızâ edüp ancak tanzîm-i esbâb-ı vezâret ve aksâ-yi diyâr-ı Hicâziyyede olan Cidde'ye übbehet ve şân ile azîmet vücûd-ı nükûd-ı nâ-maʿdûdeye mevkūf ve bî-ser ü sâmân ve muhtelü'l-hâl ü perîşân cânib-i mezkûre şitâbân olmak rezâlet ve nakīseyi müstevcib bir hâl olduğu müteyakkın ve maʿrûf olup vüzerâ-yi ızâmın muktedirlerinden birine Cidde ve tarafına bir sancak inâyet buyurulmak bâbında söz güzâr eyleyerek dest-bâz-ı niyâz oldukda aʿzâr ve irâdesi baʿzı mülâhazaya mebnî sadr-ı sâbık tarafından gayr-i mesmûʿ ve lüzûm-ı azîmeti kabûl tahallüfden medfûʿ olduğu mü'ekked tahrîrât ile müşârün-ileyhe ifâde olunup imkân-ı indifâʿ-ı me'mûriyyet hâric-i hîte-i makdûr ve tanzîm-i eştât ve zarûriyyât-ı emr gayr-i meysûr olduğundan mütereddid beyne'l-emrîn mütehayyir ve mütazaccır iken vezîriazamın makām-ı sadâretden infisâli müşârün-ileyhin sebeb-i nizâm-ı hâli ve mûcib-i inkızâ-yi âmâli olup binâenaleyh mansıb-ı mezkûr üzerinden refʿ ve Adana eyâletiyle mesrûr ve handân ve Cidde mansıbı sadr-ı sâbık-ı müşârün-ileyhe tevcîh ve ihsân ve bahren azîmeti emr ü fermân buyuruldu. Sadr-ı sâbıkın Mustafa Paşa'ya Cidde tevcîhinde medhal ve ibrâmı mütehakkik ise "el-cezâ'ü min cinsü'l-amel" mefhûmu zuhûr etdiği gayr-i hafîdir. (175-a)