Medîne-i münevvere lâ-zâlet bi-envâri's-samedâniyyeti müsevvere sükkânın akvât-ı yevmiyyelerine medâr olup ez-kadîm Mısır cânibinden tertîb ve tesrîbi muʿtâd olan gılâl ve cerâyâ ve ale'l-husûs Murâdiye ve Deşîşe ve Hasekiye ve evkāf-ı sâireden tahsîs olunan vâridât-ı muʿayyene ve vezâif-i mukannene birkaç seneden berü Medîne-i münevvere'ye vürûd eylemediğinden gayri Mısır mîrhaccı Mustafa Bey geçen sene lâzımü'l-edâ olan surrenin sülsü mikdârını iʿtâ ve sülsânını edâ edemeyüp Mısır'a vardığı gibi bahren irsâl etmek taʿahhüdiyle deyn-i bâkiye vefâ eyleyecek kadar eşyâ alâ-tarîki'r-rehn hücre-i muʿattaraya vazʿ edüp ahâli bu takrîb ile irzâ ve merkūm ahdine vefâ etmediğinden katʿ-ı nazar bu sene-i mübârekede râhile-i kalîle ile Mısır'dan hareket ve Kâbe-i mükerreme'ye azîmet ve avdeti esnâsında illet-i sâlifeye binâen Medîne-i münevvere'ye uğramaksızın nısf-ı tarîkdan cânib-i Mısır'a şitâb ü sürʿat edüp maʿiyyetinde olan Mısır hüccâcını ziyâret-i Ravza-i mutahhara'dan mahrûm ve Medîne ahâlisine geçen seneden bâkī meblağı ve bu sene edâsı lâzım gelen muʿayyenât ve vezâifi edâ etmediği hasebiyle cümlesini mağlûb-i dest-i muzâyaka ve gumûm eylediği bu defʿa nüccâb yediyle vârid olan tahrîrâtdan maʿlûm ve bu ihânet ve hıyânetin bir târîhde bürûz u vukūʿu mütetalliʿân-ı ahvâl-i âlemin mesmûʿu olmayup mîr-i mezkûrun redâet-i asliyye ve habâset-i fıtriyyesi iktizâsı olduğu meczûm olmağla gerek mîrhacc-ı merkūmun ihâneti ve gerek mahrûse-i Mısır'da teferʿun eden ümerânın irsâl-i muʿayyenâtda olan müsâmaha ve hıyânetleri keyfiyyeti nizâm-ı Haremeyn-i şerîfeyn'in ihtilâlini îcâb ve leyl ü nehâr merkez-i hizmetde pâ-bercâ-yı istikrâr olan hademeye bâʿis-i kaviyy-i halecân ve ıztırâb olduğu ihbârı müheyyic-i şefekat ve hamiyyet-i tâcdârî ve muharrik-i ırk-ı merhamet-i devlet-i şehriyârî olup ber-minvâl-i muharrer geçen seneden bâkī ve bu sene-i mübârekede aslâ verilmeyüp tamâmca der-zimmet kalan ve defter-i cevâbî ve takāʿüd mûcibince muʿayyen olan cemʿan iki yük elli iki bin beş yüz guruşun tahsîli ve Harem-i şerîf levâzımâtından revgan-ı zeyt ve şemʿ-i asel ve kandil ve hasır ve sâirin baʿs u tesbîli ve taʿmîr-i Haremeyn-i şerîfeyn içün havâle olunan meblağın îsâliyle sene-i âtiyenin tedârükâtı şimdiden görülüp bilâ-kusûr tertîb ve tekmîli hâlâ Mısır vâlisi sadr-ı esbak Yeğen Mehmed Paşa hazretlerine ve Mısır kādısı ve şeyhü'l-beled ve mîrhac ve defterdar ve sâire hitâben mü'ekked ve müşedded emr-i lâzımü'l-imtisâl ısdâr buyurulup müşârün-ileyh mevâdd-ı mezkûrenin pezîrâ-yı temşiyetini kendünün bi'n-nefs Mısır'a duhûlüne taʿlîk etmeyüp bundan akdem tevcîh-i fermânını îsâle me'mûr Dergâh-ı âlî kapucubaşılarından Çakırcıbaşı Mehmed Emin Ağa'yı İskenderiye'ye çıkdığı gibi Mısır'a irsâl ve tenbîhât-ı mülûkiyyenin infâz ve icrâsına saʿy-i bî-hemâl etmek ve bundan sonra bu umûr-ı lâzımetü'l-iʿtinâda ümerâ-yı Mısrıyye tarafından kemâkân tehâvün ve kusûr zuhûr eyler ise pençe-i saht-gîr-i pâdişâhîden girîbân-ı hayâtlarını tahlîs edemiyeceklerini ifâde ve iş'âr eylemesi emr ü fermân buyuruldu.