Dârüssaltanatü'l-aliyye'de mütemekkin olan tavâif-i inâs her hâlde melhûz-ı nigâh-ı emniyyet ve istînâs ve ser-âzâde-i gezend ü hirâs olmak pâdişâh-ı adâlet-esâs dâme-mâdâmü'n-nâs hazretlerinin kusvâ-yı irâde-i şâhâne ve müntehâ-yı metâlib-i mülûkâneleri olup fe-li-zâlike emr-i muhâfaza ve muhârese zevâbit ve rü'esânın gerden-bend-i ihtimâm ve gayretleri ve ref'-i tasallut-ı işrâr vâcibe-i zimmet-i himmetleri kılınmak mukābelesinde her biri sâye-i Devlet-i aliyye'de nâil-i ni'am-ı sehletü'l-husûl ve müddet-i kalîlede hâce-i bendergâh-ı servet ü gınâ ola-geldikleri ma'lûm-ı ashâb-ı idrâk ve ukūl olduğu ve zikr olunan zâbitânın akdem ü a'zamı yeniçeri ağaları olup fî-küll-i vakt ve hîn nehb ü yağma-yı emvâl-i nâs içün der-kemîn olan sürrâk ve şahâzîn gürûhundan beldeyi te'mîn ve tahtü'r-rimâd-ı fesâd pinhân olan nâr-ı zarar u hasâreti her bâr ihmâd ve teskîn-i illet-i gāile-i me'mûriyyetleri iken yeniçeri ağası olan Yahya Ağa bu tafsîlâtdan gāfil ve kendüye kerrâren ve mirâren vukū' ve sudûr bulan tenbîh ve te'kîdden zâhil olup vaktinde düzdân ve lusûs-ı mütekessir ve ehl-i ırz makūleleri bu takrîb ile mer'ûbü'l-kulûb ve mutazaccır olduklarından gayri zikr olunan gürûh-ı mahzûl vâfir dekâkîn ve buyûta fürce-yâb-ı duhûl ve emvâl-i halkı ahz ü gasb ile meşgûl oldukları ve bâ-husûs bundan akdem mecâlis-i müte'addidede ehl-i şûrânın istisvâb ve iğrâsıyla nizâmı menvî olan esâmeler mâddesi henüz kāle gelmemişiken mûmâ-ileyhin tehâlük ve belâdeti şuyû'-ı erâcîf ü ekâzibe bâdî (161-b) ve zâtında merkûz olan rehâvet ve adem-i dirâyet iktizâsiyle bundan böyle ağalıkdan ibkā olunsa kendüden Devlet-i aliyye'ye nâ- fi' cüz'î ve küllî bir hizmet zuhûr etmeyeceği teyakkunu azline sebeb-i âdî olup binâberîn işbu Cumâdel-ulânın dördüncü salı günü ağa-yı mûmâ-ileyh azl ü iclâ ve kul kethüdâsı olan Ahmed Ağa'ya ağalık hil'ati iksâ ve tarîkleri üzere silsile vâkiʿ olup lâyıkı vechile her biri sullem-i maksûda iʿtilâ ile kesb-i merâtib-i ülyâ eylediler.