Müşârün-ileyh işbu şehr-i Rebîʿülevvelin yirmidokuzuncu cumʿa gecesi kürsî-i eyâleti olan belde-i Travnik'de hücceten vefât eylediği haberi Âsitâne-i saʿâdet'e vürûd ve ol-vechile mansıbı münhal olduğuna binâen sâbıkā Belgrad muhâfızı olup muhâfız-ı cedîd vürûduna dek Belgrad'da ikāmeti fermân buyurulan Vezîr Râif İsmail Paşa'ya şehr-i Rebîʿülâhirin ondokuzuncu yevm-i hamîs eyâlet-i mezbûre eğerçi tevcîh ve inâyet ve kapu kethüdâsına ilbâs-ı hilʿat olundu. Ancak iki gün sonra baʿzı mülâhazaya mebnî eyâlet-i mezkûre müşârün-ileyhden sarf olunup Bender muhâfızı olan Vezîr Haseki Mehmed Paşa'ya tevcîh ve menzil ile azîmet ve seyr-i serîʿ ile hareket eylemesi emr-i âlî ile müşârün-ileyhe te'kîd ve tenbîh olunup Raif İsmail Paşa'ya Eğriboz muhâfazası ve Bucak başbuğu olup ber-vech-i arpalık Tırhala sancağına mutasarrıf olan Arslan Paşa'ya livâ-i Tırhala ilhâkıyla Bender muhâfazası tevcîh olundu. Tercüme: Müteveffâ-yı müşârün-ileyh Hekim-başı-zâde sadr-ı esbak Ali Paşa merhûmun enderûn ağalarından hazîne baş yamağı ve baʿdehû Bosna defterdârlığıyla çırağ eylediği Boşnak İsmail Ağa'nın oğlu olup bin yüz otuzbeş târîhinde mütevellid ve fark ve temyîz derecesine mütesâʿid oldukda Âsitâne-i saʿâdet'e vârid ve Sarây-ı hümâyûn'a çırağ olmakla tahsîl-sâz-ı mukaddemât-ı merâtib ü fevâid olmuşidi. Nısf-ı ikbâl add olunan vecâhet ve cesâmet-i vücûd ve baht-ı sâz-kâr ve mahsûd iktizâsıyla (160-b) zümre-i çukadârân-ı hazret-i şehriyâriye muzâf olup çok geçmeden baş-çukadarlık ile mağbût-ı akrân ve yevmen fe-yevmen hüdâvendigâr-ı sâbık-ı merhûmun nazar-ı iltifâtıyla kâmrân olmuşidi. Bundan sonra defʿaten hazîne kethüdâsı ve bir müddetden sonra müntehâ-yı hidemât-ı ricâl-i enderûn olan silâhdarlık câh-ı refîʿiyle memnûn ve dil-şâd ve cülûs-ı hümâyûn vukūʿunda hizmet-i mezkûrede bulunmak mülâbesesiyle mazhar-ı iltifât-ı pâdişâh-ı mekârim-mutâd olup hilâl-i mezkûrda Âsitâne'de kā'im-makām bulunan Vezîr Süleyman Paşa'nın şiddet-i hareket ve hiddet-i tabîʿatı mizâc-ı asra evfak olmadığından azli lâzım gelüp sâhib-i tercümeye vezâret ihsân ve kā'im-makāmlık ile çırağ-ı ikbâli fürûzân kılınmışidi. Müşârün-ileyhin irâde-i umûr-ı vezâretde mübtedîliği ve icrâ-yı lâzıme-i hükûmetde nâ-azmûdeliği hasebiyle tarafından hilâf-ı rızâ ba'zı etvâr-ı garîbe rû-nümâ olmağla azl olunup Karahisar-ı sâhib'e nefy ü iclâ ve müddet-i kalîle zarfında vezâreti ibkā ve eyâlet-i Maraş i'tâsıyla müceddeden derece-i izz ü şânı a'lâ olundu. Bundan sonra ba'zı cesîm eyâletlere vâlî ve bâ-husûs İsmail cânibi seraskerliğiyle necm-i mâhiyyeti mütelâlî olup ba'dehû memleketi olan Bosna eyâletiyle şâdân ve birkaç senede memleket-i merkūmede hükümrân ve encâm-ı kâr târîh-i mezkûrda sâkī-i dehr elinden tecerrü'-i ke's-i menûn ve fücceten fevt ile terk-i esbâb-ı tecemmülât-ı dünyâ-yı dûn eyledi. Merhûm-ı müşârün-ileyh sebât-ı kadem ile ma'rûf ve evsâf-ı cesâret ve metânet ile men'ût ve mevsûf olup tâli'inde sa'âdet ve bahtında kuvvet ve zamân-ı nezâretinde İsmail vak'asından gayri sıklet görmeyüp âlemde evkātı hoş geçmiş (161-a) vüzerâdan olduğu ma'lûm-ı ashâb-ı basîretdir.