Doksanyedi senesi Zilkāʿdesinin yirmibeşinci günü âlem-i fâniye kudûm eden şehzâde Sultan Murâd etfâle musallat olan baʿzı ilel ile bir zamândan berü hasta ve gül-i sad-berg-i vücûduna gubâr-ı rencûrî nişeste olup bi-takdîri'l-mevlâ işbu şehr-i Rebîʿülâhirin onuncu ahad günü andelîb-i rûh-ı mukaddesi kafes-i tenden cüdâ ve hırâmân-ı riyâz-ı dâr-ı bakā olup cenâb-ı hayy-i celîl şehriyâr-i bî-misl ü adîle sabr-ı cemîl ve bâkīlere ömr-i tavîl ihsân eyleye âmîn. Ol dürr-i sadefçe-i saltanatın fıkdânı eğerçi aʿlâ ve ednânın hırmen-sûz-i sabr u sâmânı ve mûcib-i nâliş-i ahzânî olup ancak Nazım: Gül ger-fütâd serv-i çemen ber-devâm bâd / Dürr-ger şikest Bahr-i Aden bâ-nizâm bâd Ger kevkeb-i münîr fürûşüd zi-âsumân (160-a) Hurşîd-i âsumân-ı saʿâdet-müdâm bâd mefhûmu salvet-resân-ı kulûb-i enâm olmuşdur.