Mülûk-i etrâfdan vürûd eden vüfûdun rütbelerine göre iʿzâz ve ikrâmları kāʿide-i hasene-i Devlet-i aliyye'den olmağla Fas hâkimi tarafından dahi vârid olan sefîrin nevâziş ve iltifât-ı Devlet-i aliyye'den hisse-mend olması husûsuna irâde-i seniyye taʿalluk edüp binâen-aleyh üçer-dörder gün fâsıla ile sefîr-i mûmâ-ileyhi ibtidâ kethüdâ bey ve baʿdehû yeniçeri ağası ve defterdâr efendi ve re'îsülküttâb efendi ve çavuş-başı ve tersâne emîni ve gümrükcü ağa daʿvet ile bast-ı niʿam gûnâ-gûn tetimme-i ziyâfetden olan sâzende ve hânende ihzâriyle defʿ-i ekdâr-ı çarh-ı vâj-gûn eylediklerinden gayri sâhilhânelerde olan mevâkiʿ-i nüzhet-efzâ ve hadâ'ik-i ferhat-bahşâyı seyr ü temâşâ etdirerek sefîr-i mûmâ-ileyhi tenşît ve tatrîb ve avdeti vaktinde münâsib hedâyâ takdîmiyle tekmîl-i emr-i tatyîb eylediler.