Bundan akdem Dergâh-ı ʿâlî yeniçerileri ve topcu ocaklarına verilen nizâma kıyâsen Dergâh-ı ʿâlî cebecilerinin serhadd ve sugūr-ı hakānîde olan neferâtı mevâciblerine dahi nizâm verilmesi esbâbına teşebbüs olunup cebeci-başı ağa tarafından dahi ol vechile istidʿâ olunmağla (V 124 - b) binâen-aleyh neferât-ı merkūmenin fî-mâ-baʿd icmâlleri doksanyedi senesinden iʿtibâr olunmak üzere sâliyânecilerin sinîn-i güzeşteleri hesâbı ocağ-ı mezbûr ricâli muvâcehelerinde rü'yet olundukda mukaddem ve mu'ahhar olan bâz-be-hazînelerinden altıyüz üç kise ile yüz yetmiş sekizbuçuk guruş nefʿ-i mîrî tahakkuk etmekle fî-mâ-baʿd doksanyedi senesinden iʿtibâriyle serhadler muhâfızlarına me'mûr Dergâh-ı ʿâlî cebecilerinin mevâcibi tanzîm olunmak husûsu taraf-ı vâzıhü'ş-şeref-i mülûkâneden baʿde'l-istîzân başmuhâsebe ve piyâde kalemlerine sûret-i nizâm-ı mezkûr kayd u sebt olunmak üzere taraf-ı âsafîden buyruldular tahrîr ve ısdâr olundu. Dergâh-ı muʿallâ yeniçeri ve topcu ocaklarının gerek hazîne-mânde ve gerek bâz-be-hazînelerinden iki bin beş yüz kise Hazîne-i ʿâmire'ye saʿy u nefʿ ne vechile tertîb eylediği mukaddemâ tafsîl olunmuşidi. Bu defʿa dahi icmâl-i mezkûr olduğu üzere Dergâh-ı muʿallâ cebecileri ocağından altı yüz kırküç kise ile yüz yetmiş sekiz guruş nefʿ-i mîrî hâsıl olduğundan fazla top arabacıları ocağından mukaddem ve mu'ahhar bâz-be-hazîne olan meblağ dahi on bin sekiz yüz yirmi üçbuçuk guruşa bâliğ ve ol dahi saʿy-i hazîne olunup bu takdirde cemʿan gerek hazîne-mânde ve gerek bâz-be-hazîne olarak ocaklardan hâsıl olan saʿy-i mîrî üç bin yüz altmış kiseye resîde (V125-a) ve fi'l-hakīka ocaklardan defʿaten bu mikdâr saʿy-i mîrînin suhûletle husûlü bir vakitde mesbûk ve şinîde olmayup kutb-i ʿâlem olan şehriyâr-ı Cem-taht ve kavî-bahtın mahzâ eser-i teveccüh-i zât-ı bâhirü'l-kerâmeti olduğu bî-reyb ü gümân ve bu madde-i müşkîlenin avn ü inâyet-i ahaddiyet ile ber-vech-i suhûlet husûlüne nazaran inşâ Allâhü teʿâlâ kâffe-i umûr-ı devlet ber-vefk-i dilhâh refte refte karîn-i hayyiz-i hüsn-i temşiyet olacağı müstebândır.