Mîrimîrân-ı kirâmdan olup müntehâ-yi serhadd-i islâmiyyede vâkiʿ Soğucak kalʿasını bir zamandan berü muhâfazaya kıyâm ve ol havâlinin oldukca âbâdânî ve imârına ihtimâm üzere olan Ali Paşa'nın şîme-i Devlet-i aliyye üzere mazhar-ı hüsn-i mükâfât olması havâli-gerd-i zamîr-i enver-i pâdişâhî olduğuna binâen işbu bin yüz doksansekiz senesi Şevvâlinin beşinci günü avâtıf-ı aliyye-i mülûkâneden mûmâ-ileyhe ihsân-ı vezâret ve mutasarrıf olduğu Ankara sancağı ber-vech-i te'yîd tarafına tevcîh ve inâyet buyuruldu. Vürûd-ı maʿrûzât ez-hânân-ı İran ve Dağıstan ve firistâden-i evâmir-i aliyye ve hedâyâ be-îşân Tiflis hâkimi olan Ereğli Hân-ı bed-peymânın düşmen-i dîn ü devlet olan Moskovlu ile güzerân eden muʿâhede ve ittifâkı ve ahad-i hümânın âhara verdiği sened (V123-a) keyfiyyeti bundan akdem mufassalan zikr ü beyân olunmuşidi. Moskovlu tarafından el-yevm Tiflis'de li-emrin ikāmet eden keferenin sergerdesi bu esnâda hânân-ı Îrân ve Dağıstan'a irsâl-i mekâtîb edüp mazmûn-ı mekîdet-meşhûnu Rusyalu Devlet-i aliyye ile müceddeden akd-i sulh edüp Tiflis hâkimi dahi ahdini tecdîd ve Rusya'ya oğullarını tesyîr ile müddeʿâsını te'yîd edüp hânân-ı Îrân ve Dağıstan dahi Hâkim-i mesfûr itāʿat ve alâ-tarîkü'r-rehn evlâd ve akrabalarından birkaç kimseyi tarafına irsâle mübâderet etsünler zemîninden ibâret olup zikr olunan hânân bu haber-i mûhiş ve bâridden müşme'iz ve müteneffir ve el-yevm memâlik-i Îrân'ın şahdan hulüvvi hasebiyle aʿdânın tamaʿı mütekessir olduğundan fazla Îrân'da olan hânân taht-ı tasarruflarında olan memleketleri alâ-hide zabt ile takayyüd ve yek-diğerin mahkûmu olan mahalle adem-i tecâvüzü taʿahhüd etmiş bulunmalariyle beynlerinde şerîta-i tesâvî mer'î ve müte'ekkid ve mukābele-i hasm ise hey'et-i ictimâʿiyye ve bir hâkim-i nâfizü'l-kavlin tedbîr ve tasarrufiyle mümkin olup müteferrikü'ş-şeml ve mütegāyirü'l-kelime asâkir ile feth-i derîçe-i hısâm ve bahr-i bî-kerân-ı muhârebeye iktihâm bi-hasebi'z-zâhir netîce-bahş-ı merâm olmadığını te'emmül ve tefekkür etmeleriyle cihet-i vahdet-i islâmiyye muktezâsı üzere Devlet-i aliyye'ye istinâd ve sergerde-i mesfûrun mektûbuna havâle-i şemşîr-i gazv ü cihâd eylediklerinden gayri cânib-i (V123-b) devlet-i zafer-menâkıbdan kendülere iʿânet olunduğu hâlde bir ferd kalıncaya dek mukābele-i aʿdâdan rû-gerdân olmayup aʿlâ-kelimetu'llah kasdiyle sell-i seyf-i celâdet ve hezz-i rimâh-ı şecâʿat edeceklerini mübeyyin Der-ʿaliyye'ye olan maʿrûzâtlariyle mahsûs bir âdemlerini Çıldır vâlisi tarafından irsâl ve müşârün-ileyh dahi hazîne kâtibini merkūma terfîkan Âsitâne-i saʿâdet'e baʿs u îsâl etmiş Ereğli ile Moskovlu'nun zikr olunan muʿâhede senedlerinde bîgâneden mektûm ve ancak beynlerinde maʿlûm bir madde-i hafiyye olduğu îmâ olunmuşidi. Madde-i mezkûre beher hâl bir devletin aleyhine dâir olduğu nezd-i ukalâda vâzıh, el-yevm vukūʿ bulan keyfiyyetden garaz-ı kâmin-i adüvv lâyih olmağla vukūʿundan evvel vâkıʿanın ilâcı görülmek mühimmât-ı dîniyye ve dünyeviyyeden olduğuna binâen derhal bu keyfiyyet-i sugür ve serhadlerde vâkiʿ vüzerâ-yı izâm ve muhâfızîn ve rü'esâ-yı asâkir-i nusret-karîne ifâde ve aʿdâ-yi li'âm-ı hudûd-ı Îrân ve Dağıstan ve tuhûm-ı memâlik-i şehriyâr-ı gîtî-sitâna tahattî ve tecâvüz ederler ise bi'l-muhâbere mukābeleye kıyâm ve yek-laht-ı ittihâd olarak himâyet-i beyzâ-i islâmiyyeye ihtimâm eylemeleri emr ü fermân olunup hânân-ı Îrân ve Dağıstan'a dahi aʿdâ-yi dînin bâdî-i emirde çerb ü şîrîn ve nihâyet-i kârda zehr-âgîn olan akvâl-i mü- mevvehelerine vücûd vermeyüp tavâ'if-i tatar ve ahâli-i Leh'e eyledikleri hîle ve hudʿadan (V124-a) mütenassıh ve pend-pezîr olarak lede'l-hâce derniyâm olan seyf-i intikāmı keşîde ve bîh-i vücûd-ı dûzah-ı karârların bürîde edüp akdâm-ı şe'âmet-encâmların kutr-ı Îran ve hıtta-i Dağıstan'a basdırmamağa sarf-ı iktidâr etmeleriyle ve Devlet-i aliyye zümre-i muvahhidîn ve isâbe-i müslimîne eynemâ kânû muʿîn ve zahîr olup himâye ve vikāyelerini vâcibât-ı dîniyyeden add eylediği zemîninde Dîvân-ı hümâyûn kaleminden mufassal evâmir-i aliyye ısdâr ve bu hılâlde zikr olunan hânların te'lîf ve te'mîn ve Devlet-i aliyye tarafına meyl ü incizâbları tarîkını tahsîlde fevâid-i kesîre mülâhaza olunduğundan gayri Sultan Ahmed Hân ve Sultan Mahmud Hân ʿaleyhime'r-rahmetü ve'l-ğufrân hazerâtı vakitlerinde zikr olunan hânlara Devlet-i aliyye tarafından katı çok hedâyâ ve teşrîfât firistâde ve bu teveccüh ve iltifât kendülere tâziyâne-i şevk olup âsârı dahi müşâhede olunmağla darb-hâne ve baş-muhâsebede mikdâr ve kemiyyetleri maʿlûm olduğu vech üzere bu defʿa dahi hedâyâ ve atâyâ tertîb ve müteʿayyinleri aharda imtiyâz olunarak taraflarına baʿs u tesrîb olundu.