Hâlâ İstanbul kādısı olan şeyhülislâm-ı esbak semâhatlû İbrâhim Beyefendi hazretlerinin mahdûm-ı necâbet-lüzûmları Mustafa Beyefendi ibtidâ-yı emirde tanzîm-i umûr-ı esʿâra kemâl-i iffet ve perhîzkârîyle mübâşeret ve avâm ve havassa pesendîde olacak vech üzere etvâr-ı âkilâne ibrâziyle kesb-i sıfat-ı memdûhiyyet ve narh-ı cârîye zamîme dâʿiyesiyle esnâfdan tarafına birkaç defʿa arz olunan mebâliğa kemâl-i istiğnâ ve diyânetinden nâşî katʿa rağbet etmeyüp bu hilâlde esnâf makūlesinden baʿzıları ahz ü kisbe me'lûf oldukları menâfiʿin maʿdûmiyyeti mülâhaza birle ifsâd-ı mâbeyne ibtidâr ve esnâf nizâmına dâir olan ahvâlin ihtilâline sebeb oluyor deyü nihânî isâ'et ve ihbârlarından nâşî bu husûs gerek sâir husûsâta dâir Bâbıâlî'ye gönderdiği iʿlâmât vaktiyle buyurulmayup iʿtibârdan sukūtu mahsûs oldukda çavuşbaşı ve tezkerecilerden sebeb-i te'hîr mevâddı istifsâr ve anlar dahi tela'süm ile cevâba ibtidâr eylediklerinden nâr-ı gayret bağrını kebâb ve sûz u güdâz sûretinde merkūmları müstahikk-i serzeniş ve itâb edüp bilâhire bu keyfiyyeti dahi mahalline katı çok zamâim-i nâ-melâm ile inhâ ve mesâvîsini leyl ü nehâr nuhbe-i ezkâr eden şahs-ı maʿlûmü'l-etvâr (V118-b) siʿâyet ve gamzını kuvvetden fiʿle îsâl ve müddet-i örfiyyesi tekmîlinden otuz gün mukaddem azliyle îrâs-ı keder ü melâl edüp binâen-alâ-zâlik işbu Ramazân-ı şerîfin yirmisekizinci günü râdde-i mezkûrede bulunan mevâlî-i izâmın akdemi Mekkî Mehmed Efendi'ye İstanbul kādılığı tevcîh ve inâyet olunup huzûr-ı sudûrda iksâ-yı hilʿat-i semmûr ve ol vechile mûmâ-ileyh nâil-i meserret ü hubûr olup selefleri müşârün-ileyh dahi sâhil- hânesinde ikāmet ve du'â-yi bekā-yi devlete muvâzabet eylemek üzere me'mûr buyruldu.