Hâlâ sadr-ı Rumeli olan Mehmed Nâfî Efendi bir zamandan berü münharifü'l-mizâc ve illeti nâ-kābil-i tîmâr ü ilâc olmakdan nâşî işbu Ramazân-ı şerîfin yirmialtıncı hamîs günü müddet-i örfiyyesin kable'l-ikmâl rûh-ı pür-fütûhu cesedinden infisâl ve dâr-ı fenâdan dâr-ı bekāya irtihâl eyledi. Münhal olan mansıbına sâbıkā Rumeli kazaskeri Ahmed Ataullah Efendi kāideten tekerrür üzere âmâde iken câh-ı merkūmdan infisâli ancak birkaç mâh olmak illeti ve kudât-ı asâkirin bu hilâlde kılleti ve bâ-husûs müşârün-ileyh Rumeli kazaskeri nasb olunduğu takdîrde birâderi Mehmed Sâdık Efendi'nin dahi Anadolu kazaskerliği nevbeti olup "be-had ne-buved birâder ger pîr-zâde est" mefhûmu üzere mukaddemâ lağv-ı pâye maddesinden miyânelerinde tekevvün (V117-b) eden münâfese-i azîme meclis-i vâhidde adem-i ictimâʿlarını müeddî olacağı mülâhazaları bu defʿa câh-ı mezkûrun âhare insirâfını îcâb etmekle binâen-aleyh sadâret-i Rumeli hâlâ Anadolu kazaskeri ve nakībü'l-eşrâf olan Dürrî-zâde Ârif Mehmed Efendi'ye ve sadâret-i Anadolu müşârün-ileyh Mehmed Sâdık Efendi'ye tevcîh ve huzûr-ı sadr-ı ʿâlîde iksâ-yı ferve-i semmûr ile kadr ü şânları terfîʿ ve tenvîh kılındı. Tercüme: Müşârün-ileyh devr-i Sultân Mustafa Hân-ı sânîde müftî'l-enâm-ı benâm olan şehîd Esseyyid Feyzullah Efendi hazretlerinin semere-i fu'âdı Çelebi Esseyyid Mehmed Efendi'nin ferzend-i emcedi olup bin yüz otuzyedi târîhinde zîb-ârâ-yı mehd-i vücûd ve ellibir târîhinde ibtidâ-i hâric ile zümre-i müderrisînden maʿdûd ve yetmişaltı târîhinde devre-i muʿtâdeyi itmâm ve Üsküdar kazâsıyla bekâm olup seksenüçde Edirne mevleviyyeti ile mesrûr ve seksensekizde Medîne-i münevvere kazâsıyla hâiz-i rehîne-i hubûr ve doksandörtde İstanbul pâyesiyle tatvîb ve doksanaltıda Anadolu sadâretiyle tefrîh ve tatrîb buyurulup târîh-i mezkûrda sadâret-i Rumeli pâyesiyle memnûn ve doksan sekizde bilfiʿil Rumeli sadâretiyle kadr ü iʿtibârı efzûn olup, [Mısraʿ] "وَاى نَعيم لا يَكدرُه الدهر" medlûlü üzere bu esnâda merâk ve dıyk-ı nefes illetleri bi'l-külliyye nefsini katʿ ve bîh-i ömrünü kalʿ eyledi. Müteveffâ-yı müşârün-ileyh hilm ü enâet ile müteʿârif ve müştehir ve irtikâb-ı menâhî ve melâhîden müteʿavviz ve müteneffir (V118-a) olduğundan fazla eyyâm-ı hükümetinde tarîk-i iktisâda riʿâyet ve insâfdan hâric harekete adem-i rağbet edüp istihrâc-ı ibâreye muktedir ve akrânı beyninde bu meziyyetle müftehir idi.