Müşârün-ileyhin mukaddemâ vâkiʿ olan Varna cenginde yararlığı mütefeyyiz ve şâyiʿ ve beyne'n-nâs şöhret-gîr olan şecâʿati sümüvv-i kadrine akvâ-yi vesâ'il ve zerâyiʿ olduğuna binâen bu hilâlde necm-i ikbâli dirahşân ve rütbe-i vâlâ-yı vezâret ihsâniyle mümtâz-ı emsâl ve akrân olduğundan fazla Halebü'ş-şehbâ eyâletiyle dâ'ire-i maʿîşeti tevsîʿ ve Boğdan başbuğluğu unvâniyle derece-i iʿtibârı terfîʿ olunmuşidi. Devlet-i aliyye tarafından nâ'il olduğu eltâf-ı mütetâbiʿü'l-vürûdu hazm u tahsîl rızâ-yı emr-i hatm bilerek muhavvel-i zimmet-i ihtimâmı kılınan umûr-ı hatîrede sâlik-i menhec-i istikāmet olduğu mahallerde reʿâyâ ve berâyâya itâle-i dest-i zulm ü gadrden mücânebet eylemesi dâreynde müstelzim-i selâmet-i nefsî iken havf-ı Bârî ve bîm-i kahr-ı şehriyârîyi hâtırdan ihrâc ve uğradığı mahalleri tâht u târâc ve bâ-husûs dâ'iresi halkının zabtına kādir olmayup Eflâk ve Boğdan reʿâyâsını izrâr ve izʿâc eylediğinden fazla bu hilâlde mahall be-mahall tahaşşüd ve ictimâʿları murâd-ı Devlet-i aliyye olan asâkir-i mürettebeden maʿiyyetine me'mûr olan askeri sû-i tedbîr sebebiyle tefrîk ve maʿiyyetine bir ferd kalmadığı resîde-i rütbe-i tahkīk oldukda hakkında gazab-ı pâdişâhî müteheyyic olup der-akab Yanya sancağı ilhâkiyle Hotin muhâfazası tevcîh (V116-b) ve sırren muhâfaza-i mezkûre mîrimîrân-ı kirâmdan Dukakin sancağı mutasarrıfı Güğeği Ali Paşa-zâde İsmâʿîl Paşa'ya tevcîh ve müşârün-ileyhin izâlesi bâbında İsmâʿîl cânibi ser-askeri olan Vezîr Abdî Paşa hazretlerine fermân-ı kazâ-mesîr tesyîr olunup vezîr-i müşârün-ileyh hazretleri dahi İsmâʿîl ordusu mahzarını irsâl ve Hotin ağası ve kâtibine ifâde-i hâl etmekle ber-mûceb-i emr-i âlî müşârün-ileyh katl ü istîsâl ve şehr-i Ramazanın ikinci günü ser-i maktūʿu Âsitâne-i saʿâdet'e îsâl olunup ibret içün saray meydânına vazʿ u ilkā ile terhîb-i kulûb-ı zaleme-i bî-insâf ve tahvîf-i ashâb-ı cevr ü iʿtisâf kılındı. Maktūl-ı müşârün-ileyhin ilhâken mansıbı olan Yanya sancağı işbu şehr-i Ramazan'ın yedinci günü hâlâ Selânik mutasarrıfı olan vezîr-i mükerrem Silâhdâr Mustafa Paşa hazretlerine ber-vech-i ilhâk inâyet ve ihsân ve müşârün-ileyhin mansıbı olan Selanik'e mukaddemâ zamîme kılınan Karesi sancağı yine târîh-i mezkûrda sâbıkā Kocaeli sancağı mutasarrıfı İsmâʿîl Paşa'ya tevcîh ile mûmâ-ileyhin ser-i iftihârı muvâzi-i Keyvân kılındı.