Zümre-i lağımcıyânın kalʿa-girlik esnâsında ne mertebe lüzûmları olduğu muhtâc-ı taʿrîf olmadığından hîn-i tertîblerinde mahsûldâr tîmârlar tevcîhiyle asâkir-i mansûrenin ekserîsinden imtiyâz olunup içlerinden biri fevt olduğu takdîrde mahlûl (V₁/108-b) olan tîmârı ecnebîye verilmeyüp fenn-i lağım tahsîline hâhiş-ger olan mübtedîlere tevcîh ve tekmîl-i fenn eylemesi zâbitân tarafından kendüye tenbîh olunduğundan gayri câ-be-câ lağım hafr ve endahte olunarak kesb-i azmâyiş eylemeleri kāʿide-i merʿiyyeden iken müddet-i medîdeden berü zikr olunan kāʿideye riʿâyet olunmayup bu takrîb ile lağımcılara kıllet târî olup binâen-aleyh sâir ocakların nizâmına ihtimâm olunduğu misillü bunlara dahi nizâm verilmeğe irâde-i aliyye taʿalluk edüp tahsîl-i fenne verziş ve kesb-i mahârete kûşiş etmek an-be-an zâbitlerine tenbîh ve nâ-ehil kimesnelere nân-pâreleri verilmeyüp, hîn-i iktizâda işe yarar dilâverlere arz olunmak husûsunda azîm teşdîd olunduğundan fazla vakit be-vakit lağımcı-başı maʿrifetiyle neferât Âsitâne'ye celb olunup lağım fenninin müzâkere ve icrâsiyle izhâr-ı sanʿat eylemeleri iltizâm olunmuşidi. Bu dikkat ve ihtimâm takrîbi ile ocak-ı mezkûrun neferâtına hâhiş-i küllî hâsıl olup tıbk-ı irâde-i Devlet-i aliyye üzere taşrada olan lağımcıyân Âsitâne-i saʿâdet'e şitâbân ve ferden ferden farîza-i zimmetleri olan hizmetin icrâsına ber-çîde-i dâmân olduklarından gayri sanʿatlerini kuvvetden fiʿile îsâl zımnında Saʿdâbâd'da kasr-ı hümâyûn pîş-gâhında olan cebelin zirvesinde vâkiʿ bir mahall-i sengistânda lağım hafr olunup derûnuna sekiz kantar barut vazʿ ve etrâf ve eknâfı sedd olunup bâlâsına ahşâbdan bir kalʿa-beççe inşâ ve âmâde ve müheyyâ olduğu lağımcı-başı tarafından inhâ olundukda husûs-ı mezkûr savb-ı sadrü's-sudûrdan mübârek rikâb-ı müstetâba arz olunup işbu Şaʿbân-ı şerîfin yirmibirinci perşembe günü pâdişâh-ı pür-intibâh dâme fî-avni'l-lâh hazretleri Saʿdâbâd'ı teşrîf buyurup ibtidâ-yı emrde toplar ve baʿdehû humbaralar endahte olunup tarraka-i raʿd-âşûb ile tâs-ı gerdûn tanîn-endâz kılındıkdan sonra zikr olunan lağıma âteş verilüp bâlâsında masnûʿ Moskov bandıralı kalʿa-beççe müteşettitü'l-eczâ ve hezâr-tîşe-i ihtimâm ile kalʿ u kamʿ-ı mümteniʿ olan kıtaʿât-ı sahrâ ber-hevâ olup neferât-ı mezkûre sanʿatlerin kemâ-yenbağî icrâ eylediklerinden mazhar-ı nevâziş-i şehriyâr-ı bî-hemtâ olmalariyle der-akab topcu-başı ağaya ve sürʿatciyân nâzırı hâcegân-ı Dîvân-ı hümâyûn Çelebi Mustafa Efendi'ye ve sürʿatciyân ağasına ve çavuşuna ve humbaracı-başıya lağımcı başıya huzûr-ı hümâyûnda iksâ-yı hilʿat-ı zâhire ve lağım endahte edenlere dahi ihsân-ı atâyâ-yı vâfire kılındı.