Dergâh-ı âlî yeniçerileri ağası olan Mahmud Ağa'nın mukaddemâ vukūʿ bulan esfârda me'mûr olduğu mahallerde yararlığı müşâhede olunduğuna binâen taraf-ı devlet-i ebed-müddetden manzûr ve dâireye takrîb ile akrânı beyninde mübâhî ve mesrûr olup ahvâl-i sâbıkasına iʿtibâren bu hilâlde devlete küllî hizmeti sebkat eder mülâhazasiyle müntehâ-yı tarîki olan yeniçeri ağalığı kendüye tevcîh ve kadr ü şânı ol vechile terfîʿ ve tenvîh olunup ağalar nasbı hâlinde sadrıaʿzamlar birkaç yüz kise akçe almak muʿtâd olmuşiken taraf-ı sadrıaʿzamîden bir akçe alınmadığı gibi serhad ağalarından ve sâir mahallerden rüşvet almamak ve umûrunda dâimâ mütabassır olup matlûb-ı şehriyârî olan nizâm-ı ocak-ı âmireye bi'l-ittifâk ber-çîde-dâmen-i gayret olmak vesâyâsı furta-gûş-i izʿânî kılınmışidi. Mûmâ-ileyhin mahlûlât husûsunda olan ihtimâmı ancak serhadlere mahsûs olup Âsitâne'den matlûb olduğu vech üzere mahlûlât göstermediğinden gayri bir serhad ağalığı mukaddemâ üç kiseye câ'ize ile tanzîm olunur iken on kise ahziyle serhad ağalarını fakr u fâkeye mübtelâ ve derd-mendleri ekâbir sûretinde olan fukarâya döndürüp fâ'ide edeceklerini pîşîn yedlerinden alup ve bu vazʿ-ı nâ-hemvâre hakīkate nazaran serhad ağalarına iʿtâ-yı ruhsat-ı nehb ü gasb edüp bundan katʿ-ı nazar baʿzı serhadlere bi'l-iktizâ akçe irsâli lâzım gelüp envâʿ meşakkat ile me'mûrlar tedârük edüp irsâli hengâmında ağa-yı mûmâ-ileyh meblağ-ı mersûmun her defʿada birer mikdârını nihânî endahte-i ceyb-i ketmânî edüp merkūmun ise cümle evzâʿı vukūʿu günü maʿlûm ve ale'l-husûs serhadlere giden akçeden alıkoyduğu meblağın mikdâr ve kemmiyyeti bi'l-istihbâr meczûm olup sebeb-i efrâz-ı meblağ su'âl olundukca yine Hazîne-i hümâyûn'a vazʿ olunmak içün kasden alıkodum cevâb-ı gayr-i müveccehini îrâd ve hakkında cârî olan hüsn-i zan ve iʿtikādı berbâd edüp serhadler mahlûlâtı husûsunda bi'l-iğrâr zuhûra gelen gayr-i minhümâsını (V₁/108-a) revâdâşte âşinâsı olmadığına binâen nush u pend kāʿidesine riʿâyeten ve bu evzâʿ-ı şütür-gürbeden ferâgat ve serhad ağalarından kāʿide-i kadîme üzere câʿize alup ziyâde şey teklifi ile izʿâcdan mücânebet ve devlet tarafından serhadlere gönderilen mebâliğa vazʿ-ı yed etmeyüp bi-aynihâ mahallerine îsâl ve sâir muhavvel-i zimmet-i ihtimâmı olan husûsların teʾdiye ve temşiyyetine saʿy-i bî-hemâl eylemesini şifâhen ve vesâteten tenbîh ve teʾkîd ve bâ-husûs esâme satmamak hususunda icrâ-yı lâzıme-i menʿ ü tehdîd olunmuşiken "et-tabʿu'l-aʿmâ sâhibuhû ve yasumm" medlûlü üzere dâmen-i ahvâline isâbet eden leke-i töhmeti şüste-i sâbun inâbet ve nedâmet etmeyüp kemâ-kân kârına revâc ve sû-i mücâzâtı hâtırından bi'l-külliyye ihrâc edüp ocaklusu dahi ahz-i rüşvet mâddesinde kendüden müteneffir ve hakkında olan kabûl-i âmme bi'l-külliyye mütegayyir olduğundan nâşî işbu Şaʿbân-ı şerîfin onbeşinci günü mûmâ-ileyh yeniçeri ağalığından maʿzûl ve kul kethüdâsı olan Yahyâ Ağa yerine mevsûl zağarcı-başı kul-kethüdâsı ve seksoncu zağarcı ve turnacılık ile nâʾil-i eʿazz-ı meʾmûl oldu.