Bâlâda zikr olunduğu minvâl üzere Nemçelü'nün taleb eyledikleri arâzî husûsu içün Devlet-i aliyye'den murahhas taʿyîn olunmayup Bosna'ya âdem tesyîr ve tahkīk-i maddeye ta'lîk vâdilerinde Nemçe elçisine takrîr verilmesi ve râzı olmadığı sûretde Devlet-i aliyye tarafından sebât gösterilmesi tasmîm olunmuş idi. Nemçe elçisi hezâr tereddüd izhâriyle sûret-i mezkûreye râzı olup binâen-alâ-zâlik Nemçelünün matâlibi beyân olunarak istimzâc ve resm-i hudûd istihrâc olunmak zemîninde Kara Bekir-zâde Elhâc Ahmed Ağa tahrîrât-ı mufassala ile Bosna cânibine ibʿâs olunmuşidi. Mûmâ-ileyh Bosna'ya vâsıl ve hâmil olduğu hudûd-nâme ve senedât sûretlerini Bosna vâlisine verüp der-akab umûr-ı serhadde vâkıf ve hudûd keyfiyyetine ârif kapudanlar ve memleket müteʿayyinleri ihzâr ve ferden ferden istintāk olunarak muttâliʿ oldukları ahvâli iş'âr ve takrîrleri üzere Saray-Bosna kadısı tarafından bir kıta i'lâma derc ile bu tarafa tisyâr olunmuş, zikr olunan i'lâmda Nemçelü'nün iddiʿâ eyledikleri arâzî dâiren-mâdâr yüz sâʿat mikdârı olup bu arâzî dâhilinde yirmibir kalʿa-i cesîme ve dört kule mevcûd ve el-yevm tasarruf ehl-i islâmda olduğu ve Nemçelü'nün iddiʿâları ahid-nâme-i hümâyûn şurûtuna ve hudûd-nâme husûsuna muhâlif olduğu tahrîr ve Kara-Bekir-zâde'nin vürûd eden tahrîrâtında Nemçelü'ye terk-i arâzî husûsu o tarafda bir ferde ifşâ mümkin olmadığı ve ifşâsında fitne hudûsu ve mehâzîr-i adîde tekevvünü bedîhî olduğu tastîr olunmuş arâzi-i mez- kûrenin tanzîmi husûsu ber-vech-i (V₁/107-b) suhûlet görülüp işâʿesi lâzım olmadığı mükâlemelerde Nemçe elçisiyle müzâkere olunmuşidi. Bosna hudûdunda vâkiʿ olan Nemçelü'nün reʿâyâsı bile bu hâle âşinâ olup kurb-ı mahall takrîbi ile Bosnalu'nun madde-i mesmûʿu ve adem-i istirdâd-ı arâzî husûsunda sebât ve metânet üzere olacakları cümlesinin meczûm ve maktūʿu olmağla defʿan li'l-ihtilâl madde-i mezkûre bir müddet meskût kalmak lâzıme-i vakt u hâl idüğü Nemçelü'ye işʿâr ve te'hîr-i maslahata böyle bir zemîn ihtiyâr olundu.