İşbu şehr-i Şabanülmuazzamın ikinci ahad günü sadrıazam hazretleri ve meclis-i evvelde mevcûd olan ulemâ ve ricâl ve mukaddemâ Bosna cânibine me'mûriyeti ile baʿzı ahvâle vukūfu olan kapucu-başı Çayır-zâde İbrahim Ağa hâne-i şeyhülislâmîde hâzır olup Nemçe elçisi ile olan mükâlemenin hülâsası ve da'vâsında olan ısrâr ve ru'ûneti der-miyân olunup Çayır- zâde dahi istintâk birle Nemçelü'nün taleb eyledikleri Hırvadlık arâzisi kıt'ası ve İrşova keyfiyyeti içün Devlet-i Aliyye'ye ne gûne hareket enfa'dır deyû huzzâra su'âl olundukda mazbatada mukayyed olmadığı vech üzere birbuçuk sâʿat kadar ricâl-i meşveret meyânında tedâvül-i ke's-i müzâkere ve (V₁/106-b) tenâvül-i nukl-i mübâhase ve muhâvere ve bilâhire Nemçelü'ye bu maddeler içün kat'î cevâb verilmek lâzım gelse defʿaten arâzi-i mezkûreyi zabt edecekleri ve merâmları üzere murahhas taʿyîn olunmak lâzım gelürse Devlet-i Aliyye mültemesâtımıza mümâşât etdi zu'muna düşücekleri muhtemel olup bu takdîrde ellidört hudûd-nâmesi muktezâsı üzere arâzî-i mezkûre Devlet-i Aliyye'nin olduğundan tegāfül ve murahhas taʿyîn olunmayarak bir kıt'a takrîr tahrîr ve mazmûnunda Devlet-i Aliyye ahid-nâme ve hudûd-nâmelerin mûcib ve muktezâlarına râzı olup Bosnalu'nun mugāyir-i ahid-nâme ve hudûd-nâme Nemçe arâzisine tahattî ve tecâvüzleri vâki' ise Devlet-i Aliyye tarafından nizâmına ikdâm olunup mahall-i nizâ' olan mevâziʿi mu'âyyene ve tahkīk içün Devlet-i Aliyye tarafından âdem taʿyîn olunmağla, elli-altmış güne dek haberi geldikden sonra muhâbere ve maddenin müzâkeresi içün murahhas taʿyîn olunur me'âli derc ü tastîr birle elçiye tercümâniyle gönderilmek, eğer elçi ısgā etmeyüp ısrâr eder ise «işte böylece olur gayri sûreti yokdur» denilmek ve fî-nefsi'l-emr mahalline âdem gönderilmek münâsibdir deyû bi'l-ittifâk karar verildiği ve böylece hareket olunduğu sûretde Nemçelü arâzi-i mezkûreyi zabt ve muhârebeye tasaddî etmek ihtimâli dahi beyne'l-huzzâr zebân-güzâr ve Nemçelü ihtiyâr-ı muhârebe ile nakz-i ahd eder ise o zamân Mevlâ kerîmdir, denildiği ve seraskerler ve serhadler muhâfızları ve bâ-husûs Bosna vâlisi mutabassır bulunmak üzere her ne kadar ikāz olunmuş ise dahi emr-i te'kîd ve tenbîhi tecdîd muvâfık-ı re'y-i sedîd olduğu meclisde mezkûr ve ol vechile amel olunacağı musammem-i cenâb-ı sadrü's-südûr olduğu beyâniyle meclise hitâm verildi. Amma baʿdü Tezyîl: Meclis-i meşveretde zikri sebkat eden bin nefer sür'atci keyfiyyetinin tafsîli bu ki Hotin ve Belgrad ve Vidin ve bunlar emsâli yirmi kadar kılâ' neferâtından mahlûl olmak üzere Yeniçeri ocağı'ndan hakîmâne ahz olunan onbeş bin iki yüz yetmişaltı akçenin cümlesi hazîne-mânde olunup mukābelesinde onbeş bin akçe yevmiyye ile bin nefer topcu sür'atcisi yine Yeniçeri ocağı'ndan tertîb ve Sür'atci ocağı'na izâfe ve tezyîb olunmağla bu takdîrde iki yüz yetmişaltı akçe eğerçi sa'y-i mîrî hâsıl oldu, ancak kılâ'-ı merkūme neferâtına evvel ve âhir edâsı lâzım olup zarûret hasebiyle sinîn-i çendinden berü havâle ve i'tâsı ukde-i te'hîr ve tesvîfe dûçâr olan mevâcib ve zahîre ve zemistânî çuka bahaları aklâm-ı (V₁/107-a) defterilerine nâtık olduğu vech üzere yalnız beş yüz ondört kiseye bâliğ olduğu tahakkuk ve madde-i vâhideden kavâid-i müte'addide taʿayyün edüp ez-cümle kâr-fermâyân-ı Devlet-i aliyye'nin alâ-tarîki'l-inhisâr nizâm ve tevfîrlerine nakdîne-i nisâr-ı cehd ü iktidâr oldukları Sür'atciyân ocağı'na tâife-i uhrâdan bin nefer ilhâk ve terfîk ve iktizâ eden yevmiyyeleri müceddeden tevcîh olunup müddet-i medîdeden berü birkaç şahsa me'kel olup baʿzı tasarrufât-ı akliyye ile bu defʿa vücûd-pezîr olan mahlûlâtdan tanzîm ve tensîk olunduğundan gayri ikiyüz yetmiş akçe dahi fazla kalup ve zikr olunan neferâtın ki her biri zâhirde Hayy ibni Yakzan ve bâtında cümlesi berzah-ı peymâ-yi yevm-i mîzândır. Sinîn-i muhtelife i'tibâriyle terâküm edüp velev-baʿde-hîn edâsı muktezî olan mevâcib ve sâir matâlibleri külliyyen lağv olup cânib-i mîrîye oldukca hiffet ve müstevfî mâl olana bir nevʿî râhat hâsıl oldu. [Mısra:] Li-misli hâzâ felyeʿmeli'l-ʿâmilûn