Nemçe tercümânının bâlâda zikr olunan vazʿ-ı bâridine bakılmayup ictimâʿ hususunun iktizâsı tekrîr oldu ve lede'l-muhabere mâh-ı mezkûrun yirmialtıncı pazartesi günü sâbıkā İstanbul kādısı Müftî-zâde Ahmed Efendi ve re'isülküttâb efendi ve Süleyman Feyzi Efendi ve Penâh Süleyman Efendi Aynalı-kavak sâhilsarayında Nemçe elçisiyle mülâkāt ve mesfûrların hudûd maddesinde erbâb-ı meşveretin müstasvebi olduğu vech üzere Devlet-i aliyye tarafından Bosna vâlisinin ve Nemcelü cânibinden hudud cenerali veyâhud âharının terhîs olunması me'mûrlar tarafından îrâd olundukda elçi-i mesfûr bir vechile mülzem olmayup murahhasların bu tarafda taʿyîni ile maddenin nizâmına mübâşeret ve tekmîl-i maslahat akabinde kezâlik bu tarafda sened verilüp icrâ-yi mazmûn-ı sened vâlî-i müşârün-ileyhe ihâle olunmak vâdilerinde gāyetü'l-gāye ısrâr birle izhâr-ı huşûnet ve Devlet-i aliyye me'mûrları taraflarından mükâleme mazbatasında tafsîl olunduğu vech üzere her ne kadar ecvibe-i mülzeme ve edille-i müskite îrâd olundu ise müfîd olmayup bi'l-âhire Devlet-i aliyye ahden ve şarten vâkiʿ olan matālibinizin tesviyesine ve Bosna vâlisinin terhîsine rızâ-dâde olup bu sûreti tarafınızdan kabûl me'mûl idi, çünki sûret-i mezkûrun kabûlü dâire-i me'mûriyetinizden hâric olduğu nihâyet-i mükâlemede tarafınızdan iş'âr olundu bir kerre evliyâ-yi Devlet-i aliyye'ye arz olunsun ne gûne îrâd buyururlar ise yine tarafınıza ifade olunur cevâb-ı hakîmânesi Devlet-i aliyye me'mûrları taraflarından i'tā olunup tayy-i bisât-ı mükâleme olundu.