Dürzî hâli, evvelâ Mîr Yâsef Şihâbî mecbûl olduğu şakāvet ve fesâdı izhâr ile uhdesinde olan mukātaʿât-ı mîrîden îcâb eden mebâliği havâle olunan sâlyânecilere edâ etmeyüp tehî-dest iʿâde eylediğinden fazla ol havâlide mütemekkin olan evbâş-ı kızılbaşdan iki bin mikdârı küştenîyi celb ve sâir Dürzî ve Kesrevân nasârâsından dahi bî-hadd ü pâyân eşkıyâyı cemʿ ile müstaʿidd-i peykâr ü harb olup bir mikdârını vâdi-i Hamâm üzerinden Sayda'ya ve bir mikdârını Ba'l-bek ve Bıkaʿülazîz ve Cıbâʿ üzerlerine tertîb ve Kızılbaş meşâyihinden Haydar-ı Fâris'i Şakîf mukātaʿâsına ve Ukayl'ı Beşâre mukātaʿası üzerine ve sâir rüesâ-yi dürziyânı birer mukātaʿaya nâmzed ve tesrîb ve ilbâs-ı hilʿa ile her birini zuʿmunca tefrîh ve tatrîb etmişidi. Zikr olunan Ukayl başında haşarât-ı vâcibü't-tenkîl ile Beşâret mukātaʿası üzerine bağteten hücum edüp Sayda vâlisi Vezîr Cezzâr Ahmed Paşa'nın silâhdarlık hizmetiyle müstahdem olup mukātaʿa-i mezkûrede mütesellim olan Süleymân Ağa'yı maʿiyyetinde olan piyâdegân ile ve etbâʿ ile zümre-i şühedâya ilhâk ve ol-havâlide sâkin olan reʿâyâ-yı pür-nifâk الحكم لمن غلب halʿ-i resen-i itāʿat ve edeb ber-muktezâ-yı hubs-ı sîret ve cinsiyyet derhâl eşkıyâ-yı mezkûreye tebaʿiyyet ve bu takrîb ile teksîr-i sevâd ve cemʿ- iyyet eylediklerinden taraf taraf mukātaʿât-ı mîriyyeye itâle-i dest-i tamaʿı dirâz ve herkes nâmzed olduğu mahalli zabta ağâz eylediği vezîr-i müşârün-ileyhin maʿlûmu oldukda dâiresinde mevcûd olan askeriyle kethüdâsı Selim Paşa'yı bindirüp Beşâret mukātaʿasında mütehaşşid olan eşkıyâ üzerine taʿyîn edüp lede'l-mülâkāt tarafeynden isâre-i gubâr-ı harb ü kîn ve tertîb-i sâk u yemîn ve birkaç sâ'at nâr-ı peykâr iştiʿâl ve bilâhire hasm-ı bed-sikâl mağlûb-i kahr nikâl olup bir mikdârı kantara-i seyfden güzâr ve bakiyyesi firâr ve mukaddemâ Sur üzerine gelen Hamza Ahmed dahi giriftâr-ı kayd-ı isâr olduğuna binâen der-akab vezîr-i müşârün-ileyh tarafından cezâsı tertîb ve bu takrîb Sur iskelesinden ve Beşâre mukātaʿasından eşkıyâ-yi mezkûre tebʿîd ve tecnîb olundukdan sonra paşa-yi mûmâ-ileyh Şakîf mukātaʿasını zabt eden Haydar-ı Faris nâm şakînin üzerine feresrân-ı teveccüh ve azîmet ve birkaç sâ'at muhârebeden sonra cemʿiyyetleri perîşân ve merkūm Haydar-ı Faris dahi nîm-cân ile girîzân olup bundan sonra vezîr-i müşârün-ileyh Dürzî (V₁/101-a) dağına nizâm vermek kaydında olduğu ve vukūʿ bulan muhârebede katʿ olunan ru'ûs-ı eşkıyâ bâ-defter tarafından irsâl olunmağla li-ecli'l-iʿtibâr saray meydânına vazʿ u ilkā olunup müşârün-ileyhin bu bâbda zuhûr eden ikdâm u himmet-i vezîrânesi nezd-i evliyâ-yi niʿamında meşkûr ve bundan böyle dahi ol havâlinin kemâ-yenbagî intizâmı kendüden hasren matlûb olduğu beyâniyle tarafına hitâben ısdâr-ı menşûr olundu.