Düvel-i nasârânın memâlik-i Devlet-i aliyye'ye hırs u tamaʿları yevmen fe-yevmen efzûn ve li-maslahatin baʿzı garazlarına müsâʿade ve mümâşâtı zaʿaf-ı hâle haml ile gün be-gün tekevvün eden tekâlîf-i mâ-lâ-yutakları tahammül derecesinden hâric ve bîrûn olup medlûlü üzere leyl ü nehâr esbâb-ı seferiyyenin istihsâline nîrû-yi gayret sarf olunduğu misillû sefer-i bahrin dahi levâzım ve mühimmâtı ihzâr ve itmâm ve lede'l-hâce mukābele ve mukātele-i aʿdâya kıyâm ile ahz-ı sâr u intikām olunmak zımnında bu sâl-i huceste-fâlde Bahreyn'e tertîb ve tesrîb olunan Donanma-yi hümâyûn misillû birer takım mersâ-yi Tersâne-i âmire'de mevcûd bulunmak ve şimdiden Âsitâne-i saʿâdet'de kalan sefâin taʿmîr ü termîm ve iktizâ eden levâzımât ve edevâtı tertîb ve tetmîm ve sene-i âtiyye rûz-ı hızırına dek ber-vech-i muharrer iki kat donanma tehyi'e ve tanzîm olunmak husûsuna irâde-i kātıʿa-i hazret-i pâdişâhî taʿalluk edüp defterdar efendi bi'n-nefs Tersâne-i âmire'ye varup mühimmât-ı mevcûdeyi bi'l-muʿâyene keşf ve defterdar efendi ricâl-i tersâne emîni ile bu ahvâli kemâ-yenbağî müzâkere akabinde cebr ve kesr ve tevfîr-i nezv husûslarına saʿy-i vâfir eylemesi dahi taraf-ı pür-şeref-i sadr-ı âlîden tenbîh olunmağla efendi-i mûmâileyhe emr olunduğu vech üzere Tersâne-i âmire'ye azîmet ve mühimmâtın mevcûd u mefkūduna dikkat edüp iki kat Donanma-yi hümâyûn kalyonlarının techîzi içün ve el-yevm mersâ-yı tersânede merbût sefâin ve Bahreyn'de olan ve müceddeden inşâsı fermân buyurulan merâkib-i bahriyye içün gayr-i ez-mevcûd iktizâ eden mühimmât ve levâzımâtı ricâl-i Tersâne-i âmire ile bi'l-müzâkere resm-i levh-i zamîr ve mufassal ve meşrûh bir kıtʿa takrîr ile arz-ı huzûr-ı sadr-ı felâtun-tedbîr edüp hulâsa-i takrîrinde tersâne emîni efendinin Der-i aliyye'de mübâyaʿa eyleyeceği bahaları nâ-maʿlûm eşyâ-yi müteferrikadan fazla işbu tertîbâtın el-hâletü-hâzihi masârifi iki yük sekiz bin sekiz yüz guruşa bâliğ ve eşyâ-yi müteferrika ile dört yüz elli kiseye mütekārib olduğun îmâ ve işbu meblâğ ne mahalden havâle olunacağını (V₁/101-b) istinbâ etmekle Darb-hâne-i âmireden dört yüz kise akçe havâle buyurulup lede'l-iktizâ ceste ceste dîvân tezkereleriyle alup mahallerine iʿtā ve şimdiden işbu tertîb-i cedîdin iʿdâd ve istikmâline müstaʿînân bi'llâhi teʿâlâ şurûʿ ve mübâşeret eylemesi tenbîhâtı gûş-i hûşuna ilkā olundu.