França ve Nemçe ve Rusya tüccârı resm-i masdariyyeden mu'âf oldukları gibi İngiltere tüccârı dahi Devlet-i aliyye'nin bu inâyetinden hissemend olmak zımnında Âsitâne-i saʿâdet'de mukīm İngiltere elçisi, devleti tarafından kendüye sevk ü taʿlîm olunarak Bâbıâlî'ye bir kıtʿa takrîr refʿ ü takdîm ve bu matlabın husûlü zımnında niyâz-ı azîm etmek ile İngilterelünün zikr olunan iltimâs ve ricâlarına müsâʿade ile celb-i hâtır u tatyîbleri bu esnâda maslahat-ı müfîdeden add olunduğuna binâen husûs-ı mezkûr, pâye-i serîr-i aʿlâya arz u ifade olunup müsâʿade-i mülûkâne erzânî buyurulmağla sahîh İngiltere tüccârı, kendü memleketlerinden Der-aliyye'ye getürdükleri emtiʿa ve eşyânın iktizâ eden rüsumunu ahid-nâme-i hümâyûn mûcibince edâ eylediklerinden sonra resm-i masdariyyeden mu'âf olmaları ve bunların mu'âfiyetleri (V₁/100-b) sâire sirâyet etmemek şartiyle şerefyâfte-i sudûr olan hatt-ı hümâyûn mûcibince Cumâdelâhire evâhirinde İstanbul ve Galata kadıları ve İstanbul Gümrüğü emînine hitāben emr-i âlî ısdâr olundu.