Tiflis hâkimi olan Ereğli çok zamândan berü diyâr-ı Îran'a istîlâ hayâl-i muhâlinde olmakdan nâşî ibtidâ Faş ve Batum'u zabt ve baʿdehû Anavarin tarîkini küşâd ile husûl-i garazına tehyie-i esbâb-ı istiʿdâd etmek dâʿiyyelerine düşdüğü serhadlerde olan hükkâm ve zâbitân taraflarından der-i devlet-medâra arz u inhâ ve Erzurum cânibinde nezâret-i umûr-ı sugûr unvâniyle mukīm sâbıkā kethüdâ-yı hazret-i sadr-ı âlî Elhac Mustafa Efendi tarafına Çıldır vâlisinin tahrîr ve terkîm eylediği kāʾimesinde mersûm Ereğli zikr olunan maslahatını teshîl içün Faş kalʿasında mütemekkin bir şahs-ı müteʿayyini baʿzı ağrâz-ı kâminesine inâle vaʿdiyle tarafına imâle eylediği dahi îmâ olunduğuna binâen ol havâlinin kemâ-yenbağî takviyesi tekmîl-i edevât ve tevfîr-i asâkir ve mühimmât ile îfâ-yı lâzıme-i intizâmı vâcib olmağla keyfiyyet-i mezkûr taraf-ı hazret-i sadrü's-südûrdan Canik muhassılı Vezîr Elhac Ali Paşa hazretleri tarafına tahrîr ve Faş ve Batum kalʿalarına birer mikdâr asker tesyîr ve an-be-an ol havâlinin muhâfazası emrinde sâk-ı ihtimâmı teşmîr eylemesi tenbîh ve te'kîd olunmuşidi, müşârün-ileyh hazretlerinin bu defʿa vürûd eden cevâb-nâmesinde Ereğli'nin di- mâğ-1 nahvetine su'ûd eden buhâr-ı bağy ve tecâvüz vâki' ve tarafına cezb eylediği şahs-ı (135-a) nifâk-âmîzîn keyfiyyeti şâyi' ve bu mülâbese ile teksîr-i mühimmât u cünûd ve hifz-ı kılâ' u hudûd muktezî olup ancak bila-ta'yînât ve mîrî Faş ve sâir mahallere asker irsâl olunduğu hâlde mukaddemâ tertîb ve tesrîb olunan yamâkān misillû pây-dâr olmayacakları ve mîrî ve ta'yînât ile techîz-i asker sâir tuhûm u sugūrda olan asâkire sirâyet ile taraf-ı mîrîye mûcib-i hasâret ve zarar olacağı mukarrer olmağla muhâfazanın semt-i suhûleti ve askerinin bekā ve sebâtı zımnında idâre-i per-kâr-ı efkâr ve Gonya sükkânından olup kesret-i havâşî ve etbâ' ve vefret-i mülhakāt ve eşyâ ile şöhret-şi'âr olan Hacı Şâhin-zâde Osman Paşa'nın oğlu Mustafa Bey'i ihzâr ve ol havâlinin keyd-i düşman-ı mekkârdan esbâb-ı vikāyesini istihbâr eyledikde mîr-i mûmâ-ileyh rütbe-i mîrimîrânî ile hâiz-i rehîne-i i'tibâr ve fakr u fâkesi hasebiyle kendüye bir mikdar meblağ i'tāsiyle ikdâr olunur ise tez elden beş yüz nefer ceng-âver asker ile Faş kal'asına duhûl ve hizmet-i muhâfazaya kemâ-hüve'l-me'mûl meşgûl olacağından fazla ol havâlide olan nüfûz-ı kelâmı hasebiyle hîn-i iktizâda etrâfdan dört-beş bin âdem cem' ü celb ve mukābele-i a'dâda tertîb-i sâk u kalb etmek üzere müte'ahhid olduğunu müşârün-ileyh hazretleri iş'âr eylemiş sûret-i mezkûrun âyine-i vukū'da cilve-nümâ olması vakt ü hâle nazaran enseb ve ecnebî (135-b) asker ta'yîninden medâhil ve mehâric-i memleketi bilür yerlü asker istihdâmı müstasveb olduğundan mîr-i mûmâ-ileyhe işbu şehr-i Recebülmüreccebin ondördüncü günü şurût-ı ânife üzere avâtıf-ı aliyye-i mülûkâneden rütbe-i mîrimîrânî ihsân ve takviye-i bâzu-yi iktidârı zımnında Hazîne-i âmire'den onbeş bin guruş i'tā ve ta'ahhüdü üzere hareket eylemesi fermân olunup Ereğli cânibine incizâbı mervî olan şahs-ı sâlifü'z-zikrin hakīkat-i hâli garazdan hâlî olarak teftîş ve tefahhus ve hakkında isnâd olunan madde-i hıyânet sübût-yâfte-i tahakkuk oldukda ahz ü habs ve keyfiyyeti der-i devlet-medâra arz u iş'âr olunmak bâbında Faş muhâfızı Vezîr Halil Paşa hazretlerine hitâben misâl-i lâzımü'l-imtisâl ısdâr olundu.