Cezayir-i garb ocaklarından sefâin-i Nemçe'ye fî-ma'ba'd ta'arruz olunmayup, ta'arruz olunduğu takdîrde tazmîn ve olunmaz ise hasâret-i müte'ayyinenin takdîr olunan kıymeti vukū'u gününden altı mâh mürûruna dek Devlet-i aliyye hazînesinden verilmek ve verilmediği sûretde memâlik-i mahrûsede Nemçelü'ye mukābele bi'l-misl icrâsı câiz olmak şurûtu bundan akdem karâr-gîr-i nizâm ve yek-diğere sened i'tāsiyle def'-i şûriş ve hisâm ve ol bâbda ocaklara ısdârı lâzım gelen evâmir-i aliyye ısdâr ve mûcibince kapudan paşa hazretleri tarafından dahi mekâtîb ba's u tisyâr olunmuş idi. Binâberîn Cezayir-i garb ocakları taraflarından bu def'a birbirine ma'ânî ve mezâmîni muvafık cevâb-nâmeler vürûd ve hülâsa-i mefâhîminde (128-b) Cezayir-i garb gavvâsân-ı bihâr-ı harb ü darb olan guzâta cây-i teneffüs ü me'vâ ve şinâverân-ı kulzüm-ı gazâ vü cihâd olan mürâbitîne furza-i âsâyiş ve ihtimâ olup gāzilerinin netîce-i fikirleri kesr-i sevret-i abede-i esnâm ve mücâhidlerinin kisb ü kârları süfün-i a'dâyı ahz ve derûnlarında bulunan emvâl ve eşyayı iktisâm edüp esbâb-ı ayşlarına bu vechile nizâm verdikleri takrîbiyle milel-i nasârı dâimü'd-dehr kendülere a'dâ ve her tarafdan memleketlerine istîlâ kusârâ-yı buğye ve menâları olup hattâ bu def'a sû be-sû üzerlerine düşman-ı dîn gulüvv ü hücûm ve mukābeleleri esnâsında eğerçi nesîm-i nusret-i ilâhiyye ile tervîc-i kulûb-i mekrûb ve mağmûm etmişler idi. Ancak itlâf-ı nüfûs ve ifnâ-yi mühimmât ve cebehâne ile hâlleri diğer-gûn ve edevât-ı kâr-zâr ve vazâif-i guzât-ı zafer-şi'âr tedârükünde acz ü zarûretleri havsala-i takrîrden bîrûn olduğu îmâ ve işâret ve pâdişâh-ı islâm halleda'l-lahü-mülkehu ile yevmü'l-kıyâm hazretlerine her hâlde ser-fürû-bürde-i inkıyâd ve itā'at olmalariyle te'yîden li'l-müdde'a Nemçelü ile musâlahaya irhâ-yi inân-ı hâhiş ve rızâ eylediler, şol şartiyle ki bedel ve avâid ile sulh içün Nemçelü bir işgüzâr âdemlerini konsoloslariyle ma'an ocağa gönderüp mu'âhede husûsunu âdetleri üzere söyleseler ve bilâ-bedel musâlahada ma'zûr oldukları ba'zı delâil ile îrâd ve vezîr-i müşârün-ileyhin evâmir-i aliyye mûcibince tahrîr eyledikleri mekâtîbde (129-a) Devlet-i aliyye'nin Nemçelü ile olan mu'âhedesini ocaklar kabûl eyledikleri hâlde edevât-ı harbiyye ve sâir melâzime ile kendülere i'ânet ve imdâd olunacağı va'd olunduğuna binâen mu'âhedeye râzı olurlar ise dahi devletin va'd-ı bî-mitâline iğtirâren olacakların zımnen iş'âr ve beher sâl taraflarına irsâl olunmasını istid'â eyledikleri mühimmât ve edevâtın defterini bu def'a Der-aliyye'ye tisyâr etmeleriyle keyfiyyet rikâb-ı kâmyâb-ı hüsrevâneye ale't-tafsîl arz u takdîm olundukda zikr olunan ocaklar kadîm ve devlete olan sadâkatleri an-samîm olup ecirleri muzâʿaf guzât-ı zafer-simâtdan olduklarından gayri Sultan Selim aleyhi rahmetü'l-mülkü'l-alîm zamânından berü Devlet-i aliyye'nin mültefet ve manzûru maʿârik-i bahriyyede cenâhı mesâbesinde asker-i mansûru olup bi-sebebin bilâ-sebeb iʿânet ve imdâdlarında tecvîz-i kusûr olunmamak tenbîhâtı cânib-i seniyyü'l-menâkıb-ı hazret-i tâcdârîden şeref-yâfte-i sudûr olduğuna binâen zikr olunan ocakların istidʿâları olan mühimmât hesâb olunup otuzyedi bin dokuz yüz otuzbuçuk guruşa bâliğ olmağla ber-muktezâ-yı vakt ü hâl bir mikdârı hatt ve tenzîl olundukdan sonra taraflarına baʿs u tesbîl olunmak tasvîb olundu.