Mülûk-ı küffâr خذلهم الملك القهار miyânında kuvvet-i mâliyye ve kesret-i merâkib-i bahriyye ile şöhret-şiʿâr olan İspanyalu'nun sinîn-i çendinden berü Devlet-i aliyye ile rabt-ı peyvend-i dostî ve safvet ve sâ'ir düvel misillü baʿzı şurût inʿikādıyla tahsîl-i sûret-i âştî ve emniyyet-i kusârâ-yı matlabları olmakdan nâşî bundan akdem müsâʿade-i devlet-i ebed-müddet ile mazhar-ı eltâf-ı şâmiletü'l-eknâf ve müceddeden akd-i şurût-ı muʿâhede ile (127-b) çehre-i ricâları dest-nevâzende-i isʿâf olup Cezâyir-i garb ocaklarının dahi işbu muʿâhedeye idhâl olunmaları tetimme-i matâlib ve tekmîle-i me'âriblerinden olduğuna binâen bu husûsun dahi cilve-ger-i meclâ-yı zuhûr olması bâbında dâmen-gîr-i ilticâ ve niyâz olmuşlar idi. Zikr olunan ocaklar öteden berü mâl-i ganâime me'lûf ve filhakīka idâre-i umûr-ı maʿâşları ancak korsanlığa münhasır ve mevkūf olduğu mülâhazalarıyla İspanyalu'nun bu istidʿâlarına müsâʿadeden iğmâz ve Cezâyir-i garb ocaklarına iştirâk-i muʿâhede teklîf-i anîfinden iʿrâz olunup ancak mersûmları dahi tevhîş ve tenfîr mugāyir-i mûcibât-ı hüsn-i tedbîr olmağla ocaklunun bu husûsda inân-ı ihtiyârları ellerine teslîm ve harb ü selm husûsunda muhayyer oldukları tefhîm ve ol bâbda ısdâr buyurulan evâmir-i aliyye İspanyalu'ya verilüp tarafeynin cebr-i hâtırlarına bu vechile takayyüd olunmuş idi. Mersûmların ocaklar ile adâvetleri kadîm ve Cezâyir'e istîlâ sûreti tahsîlinde leyl ü nehâr idâre-i per-kâr-ı fikr-i sakîm eylediklerinden gayri fî-küll-i vaktin ve an yekdiğer hakkında vukūʿ-ı fırsata nigerân olmalarıyla bu kerre İspanyalu Devlet-i aliyye ile olan muʿâhedede ocaklunun iştirâklerini irâde ve yedlerinde olan evâmir-i aliyyeyi taraflarına firistâde eylediklerinde safvet ve adâvet şıklarının birini ihtiyâr taraf-ı saltanat-ı seniyyeden mukaddemâ re'ylerine ihâle olunmuş olduğuna binâen iştirâki adem-i kabûl ve cevâb yerine irâe-i seyf-i meslûl (128-a) etmeleriyle mersûmlar dahi zûr-ı bâzû ile muʿâhedeye idhallerini kasd ve على حين غفلة من اهلها Cezâyir'e sevk-i ketâ'ib ve merâkib ve sedd ü bend-i havâlî ve cevânib edüp şîr-dilân-ı guzât-ı Cezâyir dahi teşmîr-i sâk-ı gayret ve mecbûl oldukları şecâʿat ve sarâmeti ibrâza mübâderet ve birkaç sâʿat işʿâl-i nevâ'ir-i hurûb ve tecerrüʿ-i kü'ûs-i menâyâ ve kürûb akabinde nesîm-i nusret-i samedâniyye taraf-ı guzât-ı islâmiyyeye vezân olup aʿdâ-yı dîn mahzûl ve menkûb ve münkesir ve mağlûb diyâr-ı nikbet-medârlarına avdet eyledikleri haber-i hayr-ı dâfiʿü'd-dayrı bu esnâda Der-aliyye'ye vürûd ve kulûb-i muvahhidîni mâ-lâ-mâl-i hubûr-ı nâ-mahdûd eyledi.