Şehr-i mezkûrun yirmiüçüncü günü kalʿası muhâfazası şartiyle İnebahtı sancağı ber-vech-i arpalık sadr-ı sâbık Yeğen Mehmed Paşa hazretlerine ve Vidin muhâfızlığı sâbıkā Hotin muhâfızı olan Vezîr Esseyyid Ahmed Paşa hazretlerine ve Hotin kalʿası muhâfazası şartiyle Yanya sancağı ber-vech-i arpalık sâbıkā Haleb vâlîsi Vezîr Ohrili Ahmed Paşa hazretlerine ve Haleb eyâleti sâbıkā Diyârbekir vâlîsi olan Vezîr Esseyyid Abdi Paşa hazretlerine ve Sivas eyâleti sâbıkā Rakka vâlîsi olan Vezîr Abdülcelîl-zâde Süleyman Paşa hazretlerine ve Selanik (123-a) sancağı Karesi sancağı ilhâkıyla ber-vech-i arpalık Silâhdâr Mustafa Paşa hazretlerine ve kalʿası muhâfazası şartiyle Eğriboz ve Karlı-ili sancakları sâbıkān Selânik mutasarrıfı Livadyalı vezîr Hasan Paşa hazretlerine ve İlbasan sancağı sâbıkān İnebahtı muhâfızı mîrimîrân-ı kirâmdan İbrâhim Paşa'ya ve Sultanönü sancağı sâbıkān Çirmen muhâfızı Zaralı-zâde Abdullah Paşa'ya tevcîh ve ihsân ve kapu-kethüdâları huzûr-ı mevâhib-mahsûr-ı sadrü's-sudûrda ilbâs-ı hilʿat ile kâmrevâ ve Marʿaş eyâleti dahi Dulkadir-zâde Ömer Paşa'ya takrîr ve ibkā buyurulup sâbıkān Sivas vâlîsi Vezîr Esseyyid Mustafa Paşa hazretlerinin mizâclarında illet olup haml-i sakîl vezâreti tahammülden izhâr-ı acz ü fütûr ve takāʿüd ihtiyârıyla cûyende-i ârâm ve huzûr olmağla binâen-aleyh sâdır olan hatt-ı hümâyûn-ı şevket-makrûn mûcibince tuğları refʿ olunup civâr-ı hazret-i Hâlid'de vâkiʿ halîle-i celîleleri ismetlû Şah Sultan-ı aliyyetü'ş-şân hazretlerinin sâhil-serâlarında ikāmet ve duʿâ-yı ömr ü devlet-i pâdişâhîye muvâzabet eylemesi bâbında emr-i âlî ısdâr buyuruldu.