انظر الى حسن زهر الروضة البهج و اسمع ترنم هذا لطائر اللهج تجلى الرياض وقينات الحمام شدت والزهر يحرق عرف المندل الرطب Bi-hamdihi sübhânehu ve teʿâlâ atyeb-i mevâsim ve eyyâm olan fasl-ı bahâr idrâk ve âyine-i çehre-i zamâneye şiddet-i zemistândan ârız olan zeng-i inkıbâzı mücellâ ve tâbnâk edüp feyz-i nâmiye-î rebîʿ ile deşt ü sahrâ numûne-nümâ-yı sâha-i cennetü'l-me'vâ ve benât-ı nebât hulel-i zeberced-fâm ile bâğ u rağda kāmet-efrâz-ı işve vü istiğnâ olup hatîb-ı andelîb firâz-ı gülbünde hutbe-i sultân-ı gülü gûş-ı mutavattınân-ı çemene îsâl ve naʿat-hân-ı şâh-ı gül ya'ni bülbül şûrîde-dil mahfel-i merg-zârda sitâyiş-i şâh-ı bahârı tafsîl ve icmâl edüp, Nazm: Şeh-i bahâr hele ahdi müstedâm olsun Yine ehâlî-i gülzâra etdi (122-b) lûtf-ı amîm Raʿiyyet-i çemenin kaldurup avârızını Yerine geldi şeneldi o Hândân-ı kadîm Urûk-ı huşk-ı kürûma nemâ edüp sereyân Göründü sırr-ı hayât-ı kühen ızâm-ı ramîm Basît-ı gabrâ riyâhîn-ı gûnâ-gûn ile mânend-i nakş-ı bukalemun ve saha-ı serâ envâʿ-ı envâr u ezhâr ile neşât-efzâ-yı derûn olup fe-li-hazâ tabʿ-ı hümûyûn-ı safâ-makrûnda meyl-ı tenezzüh ü tenakkul derkâr ve tebdîl-i makarr u mekâna hâhiş ü rağbet bedîdâr olmağla işbu Cumâdelâhirenin yirmiüçüncü hamîs günü mânend-i hüsrev-ı felek-ı çehârim bir burcdan bir burca âzim ya'nî sarây-ı dilârâ-yı mülûkâneden bi'ş-şevketi ve'l-ikbâl zevrak-süvâr-ı nakl ü hareket ve gıbta-fermâ-yı cinân-ı erbaʿa olan nüzhet-sarây-ı Beşiktaş'a sâye-endâz-ı mecd ü übbehet oldular.