İşbu sâl-i huceste-fâlde Donanma-yı hümâyûn'a her seneden ziyâde takayyüd ü ihtimâm ve edevât ü levendâtı bilâ-kusûr ikmâl ü itmâm buyurulup mevsim-i rûz-ı Hızır dahi hulûl ve mürûr eylediğine binâen işbu şehr-i Cumâdelâhirenin yirmiikinci çarşanba günü kapudan-ı deryâ vezîr-i mükerrem Gazi Hasan Paşa hazretleri mersâ-yı nusret-sây-ı Tersâne-i ʿâmire'den refʿ-ı lenger-i ikāmet ve ârâm ve Yalı pîşgâhında âlây gösterüp muʿtâd üzere müşârün-ileyh hazretlerine ve ümerâ-i deryâ ve kapudanlara kürk ve hilʿatler ilbâs olunup her biri mazhar-ı nevâziş-i tâm oldular. Mukaddemâ Malta keferesi yedine bi-kazâi'llâhi teʿâlâ giriftâr olan şeytenin bi-eyyi-vechin-kân istihlâsı ve Bahr-i sefîd'in düşman-ı dîn korsanlarından istisfâsı şifâhen taraf-ı müstecmiʿü'ş-şeref-ı hazret-i tâcdârîden müşârün-ileyh hazretlerine bundan evvel emr ü fermân ve bu sene-i mübârekede ne semtlere varacağı ve ne mahalde geşt ü güzâr eyleyeceği suʾâl-i hikmet-meʾâli güzerân eyledikde zabt-kerde-i dest-i aʿdâ olan sefîne-i mârrü'z- zikrin (122a) bi-havli'l-lâhi ve kuvvetihi tahlîsi husûsuna sarf-ı makdûr ve ahz-i intikām zımnında sa'y-i mevfûr etmek üzere taʿahhüd ve Donanma-yı hümâyûn'un geşt ü güzâr eyleyecek cezâir ve sevâhili ferden ferdâ beyân ile icrâ-yı lâzıme-i muhâfazaya kemâ-yenbagî ihtimâm ve takayyüd edeceğini bir kıt'a takrîrinde zikr ü tafsîl etmiş idi. Bu defʿa dahi hasbe'l-âde atebe-i seniyye-i şehriyârîye rû-nihâde oldukda taraf-ı hümâyûndan vesâyâ-yı sâlife istînâf ve iʿâde ve kemâl-i emniyyet-i Bahr-i sefîd hasran matlûb olduğu müşârün-ileyhe emr ü ifâde buyuruldu.