Hüdavendigâr-ı sâbık behişt-câ, firdevs-me'vâ Sultan Mustafa Hân hazretlerinin benât-ı hûr-sıfatlarından tâcü'l-muhadderât iffetlû Beyhan Sultan ve eklîletü'l-muhassenât ismetlû Hadîce Sultan hazerâtının idrâk-i vakt-i tezvîcleri hasebiyle birer vezîr-i rûşen-zamîre akd olunmaları emrine bundan akdem irâde-i menâyih-ifâde-i mülûkâne ta'alluk etmekden nâşi müşârün-ileyhâ Beyhan Sultan hazretleri Vezîr Silâhdâr Mustafa Paşa hazretlerine akd ü tezvîc ve Hadîce Sultan hazretleri Vezîr Esseyyid Ahmed Paşa hazretlerine şimdilik namzed kılınmağla metâʿ-ı i'tibârı tervîc olunmak tasmîm buyurulup müşârün-ileyh Mustafa Paşa hazretlerinin Âsitâne-i saʿâdet'e da'vet içün berîd-i meserret-nüvîd bâ's u tesyîr ve kezâlik beşâret-i nâmzedî ile Seyyid Ahmed Paşa hazretlerinin bâsire-i ibtihâcı tenvîr olunmuşidi. Bu esnâda Mustafa Paşa hazretleri hâl-i cemâl-i Arabistân olan Halebüşşehbâ'dan fekk-i tınâb-ı ikāmet ve süvâr-ı rehvâr-ı isti'câl olarak vâsıl-ı Âsitâne-i saʿâdet olup (120b) mefhûmu üzere işbu şehr-i Cumâdelâhirenin sekizinci erba'â günü şeyhülislâm ve müftilenâm hazretleri Saray-ı hümâyûn'a da'vet ve Dârüssa'âdetü'ş-şerîfe ağası hazretlerine muhtas olan odada bisât-ârâ-yı ikāmet oldukları esnâda vezîreyn-i müşârün-ileyhimâ hazerâtı tarafından bundan akdem tertîb olunan nişân takımlarını mu'tâd üzere sağdıc taʿyîn olunan kethüdâ-yı bî-hemtâ-yı hazret-i âsafî Esseyyid Mehmed Hayrî Efendi hazretleri mu'anven âlây ile Enderûn-ı hümâyûn'a îsâl ve takdîm ve tarafeyn vekilleri hâzır oldukları hâlde ma'lûmü'l-mikdâr mehr üzerine Beyhan Sultan aliyyetü'ş-şân hazretlerini Mustafa Paşa hazretlerine mevlânâ-yı müşârün-ileyh hazretleri akd buyurup duâ akabinde ilbâs-ı mu'tâd olan zevât-ı kirâma semmûr kürkler ve hil'atler iksâ ve ba'zı zevâta dahi surreler i'tā ve şehr-i mezkûrun onbeşinci çarşanba günü sultân-ı müşârün-ileyhâ hazretlerinin Saray-ı hümâyûn'dan cihâz-ı cihân-bahâları nakli fermân buyurulmağla kân-ı imkânda nâdirü'l-vücûd ve hazâin-i mülûk-ı âfâkda emsâli kemyâb ve nâ-bûd cevâhir-i müşaşa'a ve emti'a-i mülemma'a ve evânî-i talâ ve sîm ve esâs-ı mümteni'atü't-takvîmleri âlây-ı vâlâ ve tertîb-i dilârâ ile ismet-sarây-ı sultânîlerine nakl ve ferdâsı müşârün-ileyhâ hazretleri sâirinden müzeyyen âlây ile hacle-i ismet ve beytü'l-arûs-ı iffet olan harem-i irem-veşlerin teşrîf buyurup (121a) erbâb-ı âlây avdet ve ancak sadrıazam-ı âlî-makām ve şeyhülislâm-ı benâm ve kapudan-ı deryâ ve ricâl-i bâb-ı şeref-intima zânü- zede-i visâde-i ikāmet oldular. Bu hilâlde gâh sohbet-i hassü'l-hass ile imrâr-ı ezmân ve gâh istimâʿ-ı hânendegân ve sâzendegân ile tenşît-i ezhân ve baʿde'l-mağrib Dârüssaʿâde ağası hazretleri dahi saray-ı mezkûre gelüp baʿde'l-ʿişâ vezîr-i müşârün-ileyh hazretleri harem-sarây-ı sultânîye duhûl ve müşârün-ileyhim hazerâtı dahi avd ü kufûl ve seheri dâmâd paşa hazretleri Bâbıʿâlî'ye vürûd ve takbîl-i dâmen-i sadrü'l-vüzerâ ile ihrâz-ı şeref-i nâ-maʿdûd edüp taraf-ı âsafâneden bir ferve-i semmûr zîver-i ʿâtık-ı mefhareti kılındıkdan sonra saraylarına avdet ve baʿde'l-cumʿa kutb-ı dâire-i hilâfet ve şems-i âsmân-ı saltanat olan şehriyâr-ı ʿâdil ve pâdişâh-ı deryâ-dil hazretleri dahi muʿtâd üzere saray-ı sultânîye pâ-nihâde-i iʿtibâr ü şeref ve dâire-i Harem-i muhterem'de çâr-bâliş-i nişîn-i şevket olarak ihyâ-yı resm-i selef buyurup akşama karîb bi'd-devleti ve'l-ikbâl hareket ve dürr-i yektâ-yı vücûd-ı hümâyûnlarına sadef olan saray-ı behişt-âsâlarına avdet buyurdular dâmâd paşa hazretlerinin kapu kethüdâları olan Mustafa Ağa bu esnâda mendîl-bend-i meyân-ı hizmet ve berzede-i dâmân-ı gayret olmakdan nâşî meclâ-yı jeng-beste-i emeli perdâht-kârî-i teveccüh ü ikbâl ile mücellâ ve musaykal ve ukde-i saht-beste-i (121-b) maksûdu nâhun-ı iltifât ve nevâziş ile münhâl olup bilfiʿil kapucu-başılık rütbesini ihrâz ile ser-efrâz oldu.