Bundan akdem sahîfe-zîb-i beyân olduğu üzere Şam vâlîsi iken fevt olan Azm-zâde vezîr Mehmed Paşa'nın zâhirde terk eylediği emvâl-i mevcûde ve nukūd-ı maʿdûdesi temâdî-i hengâm-ı imâret ve tevâlî-i eyyâm-ı vezâretine nazaran tasavvur olunan derecenin miʿşârı ve dahl ü harcına vâkıf olanların radde-keş-i tahmîn oldukları aʿdâdın ednâ mikdârı olduğuna binâen zuhûr-ı mâl-i mestûruna medâr olur hayâliyle baʿzı mukarreb etbâʿ vü hüddâmı ve ale'l-husûs bir müddetden berü Cerde başbuğu olup evlâdının min-ciheti'l-muhabbe eʿazz u akdemi ve esrâra dâir ahvâlinin mahremi olan mîrimîrân Abdullah Paşa ile damadı Nasuh Bey ki Vezîr Saʿdeddin Paşa merhûmun oğludur. Âsitâne-i saʿâdet'e ihzâr olunup vusûllerinde mûmâ-ileyhim ferden ferdâ istintâk ve ketm ü ihfâ semtlerine sâlik olmadıkları hâlde ser-safha-i arzûlarında mürtesim olan matâlib ve merâtib ile her biri mazhar-ı nevâziş ü işfâk olacakları dahi işrâb olunup mevcûd olan (119-a) mâlin gayrisine adem-i vukūf ve usûrların îmâ ve yekdiğere gayr-i muhâlif takārîr ile âyîn-i yek-cihetî ve ittihâdî icrâ eylediklerinde, Mısraʿ: "Aʿtı ileyhi temraten feinne ebâ fe-cemraten" mefhûmu üzere teshîlen li'l-maslaha vüche-i rifk u mülâyemet semt-i kahr u gazaba tahvîl ve haklarında derkâr olan muʿâmele-i lûtf zecr ü unfe tebdîl olunarak bâzû-yi cahd ü inkârları tâfte-i pençe-i şikence-i ibrâm ve târ-ı enfâs-ı hayâtları küsüste-i mikrâz-ı inʿidâm olacak derecelerde tazyîk ve izʿâclarına ihtimâm olunmuş iken kavl-i evvelde sâbit-kadem ve mütehammil-i envâʿ-ı elem ü sitem olduklarından gayri ilâ-yevmi'l-kıyâm mağlûl ve mukayyed mahbesde muhalled olsalar bile bir fâide-i zâide hâsıl olmayacağı sübût-yâfte-i tahakkuk olmağla lâ-cerem me'mûrlara küllî hayret müstevlî ve himmet ve ikdâmlarına fütûr ve rehâvet târî olup encâm-ı kâr cânib-i mîrîye küllî hizmet izhâriyle tahliye-i sebîllerine ibtidâr olunacağı mûmâ-ileyhime iş'âr olundukda devlet-i ebed-müddet tarafından bir nevʿ-i iltifâta mazhar olmadıkca matlûb olan hizmetin edâsında bi'z-zarûre kusûr edecekleri aʿzârını bast u îmâ ve kendülere bâ-rütbe-i vâlâ-yı vezâret birer eyâlet ihsân ve inâyet olunur ise taksît ile cânib-i mîrîye üç bin edâ ve teslîm eyleyeceklerini ifâde ve inbâ etmeleriyle fi'l-hakīka niyâzlarına sûret-i müsâʿade-i irâeti vücûh-ı menâfiʿ-i müstelzim olup ez-cümle yedlerinde mâl-i mektûm var ise dahi el-hâletü-hâzihi edâ ve teslîmine müteahhid (119-b) oldukları mertebelere ancak resîde olacağı zâhir olmağla anı dahi kıst be-kıst Devlet-i aliyye'ye vermiş olurlar. Sâniyen, bunlara vezâret ihsânı Şam vâlisinin ân be-ân inân-ı rıbâ-yı sabr u sâmânı olup hilâf-ı rızâ hareketden ictinâb ve muhavvel-i zimmet-i himmeti olan hidemâtda gün be-gün izhâr-ı kemâl-i sadâkat ve istikāmet eyleyeceği bî-irtiyâb olduğundan fazla Azmzâde neslinden şimdiye dek otuzdan mütecâviz vüzerâ ve mîrîmîrân zuhûr edüp cümlesi Devlet-i aliyye'ye mutîʿ ve münkād ve bir ferdinden şâibe-i isyân ve ru'ûnet mahsûs olmadığı ma'lûm-ı kâffe-i ibâd olup ale'l-husûs Şam havâlisinde ızâm-ı kadr ü şânları keş-şems fi'l-hevâcir nümâyân ve zâhir ve vak' u rağbetleri sâir vüzerâdan ziyâde ve vâfir olup, [Mısra]: Nice bâzîçesi var dünyânın medlûlü üzere lede'l-iktizâ istihdâm içün elde bulunacakları hüsniyyâtı etrâfiyle rikâb-ı kâmyâb-ı hüsrevâneye arz u takdîm olundukda haklarında avâtıf-ı aliyye-i mülûkâne erzânî buyurulup umûr-ı Şâmiyyenin ihtilâlden muhâfazası irâdesiyle mültemeslerinin aʿzamı olan eyâlet-i Haleb kendülerden sarf ve oldukca Şam'a bu'dî olan Rakka Eyâleti bâ-rütbe-i vâlâ-yı vezâret Abdullah Paşa'ya ve Diyârbekir Eyâleti kezâlik rütbe-i sâmiye-i vezâretle Nasuh Bey'e şeref-yâfte-i sudûr olan hatt-ı hümâyûn-ı mevhibet-makrûn mûcibince işbu şehr-i (120-a) Cumâdelâhirenin onsekizinci sebt günü tevcîh ve ihsân ve huzûr-ı âsaf-ı Felâtun-tedbîrde serâsere kaplu semmûr kürkler ilbâsiyle ser-i iftihârları muvâzi-i ferk-ı Ferkadân kılındı.