Sen ki vezîriaʿzam ve vekîl-i mutlakımsın seni selâm-ı selâmet-encâm-ı şâhânemle tekrîm eyledikden sonra maʿlûmun olsun ki hizmet-i celîle-i vekâlet-i küberâma me'mûr kılındığından bu vakte gelince bilcümle umûr-ı dîn ü devletime saʿy ü gayret ederek cümleden evvel ve elzem olan ocaklarım kānûn u nizâm-ı kadîmlerini icrâ ve ihyâya saʿy ile cümle ocaklu kul- larımın hâllerine riʿâyet ve mevâciblerini vakt ü zamâniyle bilâ-zahmet tahsîl ve tevzîʿe dikkatin ve tasarrufât-ı hasene ile beytü'l-mâl-i müslimîne hizmet ve serhaddât-ı hâkāniyyemin nizâm ve istihkâmlarına gayretin ve rü'yet-i ibâdda hakkāniyyet vechile hareketin nezd-i hümâyûnumda ve cümlenin indinde maʿlûm ve iyândır. Bu defʿa kıst-ı vâhid mevâcibinin tevzîʿiyle zuhûr eden hizmetine ivâzan hassa kürklerimden bir sevb semmûr kürk ve bir kabza mücevher hançer hazînedâr ağa kulum ile irsâl olunmuşdur. Cenâb-ı Hakk'dan (118-b) me'mûldür ki zamân-ı devletimde dîn-i mübîne katı çok hayırlu hizmetlerde bulunarak sâye-i şâhânemde olan ibâdu'l-lâhın rahatlariyle taraf-ı hümâyûnuma dâimâ celb-i duʿâlarına bâʿis mesâʿîde bulunmakdan hâlî olmayasun gerek sen ve gerek seninle bi'l-ittifâk dîn ü devletime sâdıkāne hizmet edenlerin iki cihanda yüzleri ak ola, âmîn. İntehe'l-hattü's-sultânî.