Küllü ibni ünsâ ve in tâlet selâmetühû / Yevmen ʿalâ âletin el-hadbâ'i mahmûlü. Medlûlü üzere Erzurum vâlisi sadr-ı esbak Dârende'li Mehmed Paşa'nın dâdende-i dest-i kadr olan temessük-i ömr-i se-rûzesinin vaʿdesi hulûl ve pençe-i saht-gîr-i garîm-i ecel dâmen-i hayâtını devşirüp mahkeme-i rûz-ı cezâya mevsûl eylediği haberi işbu şehr-i Cumâdelulânın evâhirinde Âsitâne-i saʿâdet'e vürûd etmekle bir zamândan berü Dîvân-ı hümâyûn'da ça- vuş-başı olup Erzurum'da müddet-i medîd ikāmeti hasebiyle ol-havâlinin kâffe-i umûr[u] husûsuna vukūf-ı tâmmı olan Süleyman Ağa'ya şehr-i mezkûrun yirmialtıncı cumʿa günü avâtıf-ı aliyye-i mülûkâneden bâ-rütbe-i vâlâ-yı vezâret eyâlet-i mezkûr ihsân ve inâyet ve huzûr-ı sadrü's-sudûrda (114a) serâsere kaplu ferve-i semmûr ilbâsıyla hâiz-i rehîne-i mefharet buyurulup Dîvân-ı hümâyûn çavuş-başılığı dahi Tersâne-i âmire emîni ve hîn-i neş'etinden bu âna gelince me'mûr olduğu hidemâtda izhâr-ı sadâkat bîşe ve âyîni olan Sırrı Selim Efendi'ye tevcîh ile dâire-i hazret-i âsafîye takrîb ve Tersâne-i âmire emânetiyle sâbıkā arpa emîni Ataullah Bey-efendi tatyîb olundu.