İşbu şehr-i Cumâdelulânın yirmibeşinci hamîs günü sadrıazam-ı yemm-kerem ve şeyhülislâm-ı fazâil-şiyem hazerâtı müceddeden inşâ olunan sandal ve fülke-i hümâyûnun deryâya indirilmesiyçün Yalı köşkünde hâzır ve vakt-i muhtâr hulûlüne nâzır olmalariyle takarrüb-i vakt-i muntazar haber verildiği anda hareket ve bi'l-mürâfaka Kayıkhâne'ye azîmet buyurduklarında huffâz-ı hoş-elhân kırâ'et-i Kur'ân-ı azîmü'ş-şân ve mevcûd olan şuyûh-i riyâzat-rüsûh bi-hulûsi'l-cenân daʿvât-ı hayriyyeyi îsâl-i künküre-i âsûmân eylediklerinden sonra sandal-ı hümâyûn (113-b) rû-yı deryâya ilkā ve bostancı-başı ağaya ve sâirlere muʿtâd üzere hilʿatler iksâ ve bâ-husûs şeyhlere ilbâs-ı ferâ ve taraf-ı sadrü'l-vüzerâdan curûh-ı iflâsa merâhim olan derâhim iʿtā ve bundan sonra müşârün-ileyhimâ hazerâtı Tersâne-i âmire'ye bi'd-devleti ve'l-ikbâl âzim ve nüzûlü musammem olan fülke-i hümâyûnun dahi deryâya nüzûlü hizmetine kāim olmalariyle ol hizmet-i seniyye dahi itmâm ve tersâne ricâli bu sebeble nâil-i atāyâ ve mazhar-ı ikrâm olup şehzâdegân-ı civân-bahtân hazerâtiyçün dahi inşâ olunan üç kıtʿa sandalların deryâya nüzûlü hizmeti yevm-i mezkûrda bostancı-başı ağa maʿrifetiyle îfâ olundu.