Birkaç günden berü illet-i mesâne ve ırkü'n-nesâ ile ser-nihâde-i bâlîn renc ü ʿanâ olan Re'isülküttâb Elhâc Mustafa Efendi'nin marazı yevmen fe-yevmen müştedd, Mısraʿ: "وداء الموت ليس له دواء" me'âlinden gāfil olan huzzâk-ı etibbâya ebvâb-ı muʿâlece münsedd olup işbu şehr-i Cumâdelulânın onbeşinci günü menşûr-ı hayâtı dest-i ecel-i nâgeh-resîd ile pîçîde-i kîse-i inkızâ ve ʿâlem-i gaybdan gûş-ı hûşuna vâsıl olan misâl be-misâl irciʿîye gerdân-dâde-i tavʿ u rızâ olup münhal olan hizmet-i celîle-i riyâset bir müddetden berü defterdâr-ı şıkk-ı evvel ve umûr-ı mîriyyede mâlik-i zimâm-ı ʿakd ü hall olan Feyzî Efendi hazretlerine çespân u mahall görülmekle yevm-i mezkûrda reviş-i istîhâl ve istihkāklarına hilʿat-i mûrisü'l-behcet-i riyâset iksâ ve zimâm-ı umûr-ı düvel dest-i sadâkat-peyvestlerine iʿtâ olundu. Müşârün-ileyh hazretleri (112-a) "تخلقوا يا خلاق الله" niʿmet-i azîzü'l-menâlinden hisse-yâb ve vech-i talık u lisân-ı zalak ile mahbûb-ı kulûb-ı şeyh ü şâbb olduklarına binâen bu iltifât-ı cedîdin haklarında zuhûru halkın vesîle-i inbisât ve hubûru olmuşdur. Defterdarlık câh-ı münîfi dahi mukaddemâ üç defʿa Dîvân-ı ʿâlî'de çavuş-başı olup muhavvel-i ʿuhde-i sadâkati olan umûr u husûsda rüşd ü reviyyeti ke'ş-şems fî-râbiʿatü'n-nehâr bedîdâr olan defter emîni Ahmed Nazîf Efendi hazretlerine tevcîh ve inâyet ve defter emânetiyle sâbıkā Tersâne-i âmire emîni olan Hasan Efendi memnûn-ı lûtf-ı mürüvvet buyuruldu. Tercüme: Müteveffâ-yi müşârün-ileyh mukābele-i suvâri ikinci halîfesi Süleyman Efendi'nin gusn-ı devha-i vücûdu ve semere-i şecere-i zât-ı bihbûdu olup bin yüz otuz târîhinde saray-i şeşder-i müstahîlü'l-bekāya vürûd edüp hacr-i terbiye-i peder-i müşfikde hâr-zâr-ı akabât-ı tufûliyyetden âzâde ve gülistân-ı reye'ân-ı cevânîye pâ-nihâde oldukda, Nazm: “İkbil ‘ale’n-nefsi ve’stekmil fezâ’ilehâ / fe-ente bi’n-nefsi lâ bi’l-cismi insânün” medlûlü üzere tehzîb ve istikmâl-i nefse mübâderet ve takvîm-i eved-i zâta himmet “ve’l-veledü’l-harîk-i fî-bi’ân-i âbâ’ihi’l-fer” mantûkunca tarîk-i tahsîl-i maʿârife sâlik ve asrında yeke-suvârân-ı meydân-ı fazl u irfân olan ihvândan iktibâs-ı envâr-ı kemâlât ederek nisâb-ı hünere mâlik olmağla bi'l-istihkākü'z-zâtî altmışaltı târîhinde arabacılar kitâbeti ile defʿaten zümre-i hâcegâne muttasıl ve baʿdehû baş mukātaʿa ve hâl-i bedîʿü'l-fiʿali (112-b) merhûm Abdi Efendi nişancı oldukda tuğrakeşlik ve defterdar oldukda kisedarlık hizmetleriyle müştagıl olup yetmişaltı ve yetmişsekizde birer sene fâsıla ile mükerreren kâtib-i sipâhiyân ve vasat-ı tarîka vusûl ile mahsûd-ı emsâl ü akrân ve seksenikide Ordu-yi hümâyûn'a getürdülüp “el-merʾü ehmed” müeddâsınca sâlisen sipâh kitâbeti ile nâil-i eʿazz-ı emânî ve Han tepesi ve Bender avdetinde tezkere-i sânî ve Şumnu'da büyük tezkerecilik ser-satr-ı unvân-ı kadr ü şânı olduğundan gayri vekâlet-i riyâset ile dahi merâtib-i aliyyeye tahsîl-i istiʿdâd ve Ordu-yi hümâyûn Âsitâne-i saʿâdet'e gelüp ordu ricâlinin ekserîsi azl ve mübtelâ-yi müzâyaka ve ezell olmuşiken hasâis-i hamîde ve efʿâl-i ber-güzîdesi bekā-yi mansıbına küllî imdâd edüp doksanüç târîhinde sadr-ı âlî kethüdâlığı ile mümtaz ve sinîn-i çendinden berü sebkat eden hidemât-ı sabıkānesinin müşâhede-i pâdâş ve hüsn-i mükâfâtiyle serfirâz olmuşidi. Doksandört senesi sâdâret-i uzmâ kethüdâlığından maʿzûl ve kûşe-güzîn-i inzivâ ve humûl olmuş iken defter emânetiyle tatyîb ve doksanyedide tevkīʿî câh-ı refîʿiyle tefrîh ve tatrîb buyurulup sene-i mezkûrede riyâset-i küttâb hizmet-i menîʿasiyle tekmîl-i tarîk ve işbu şehr-i Cumâdelulânın onbeşinci günü dest-i saht-ı ecel girîbân-ı hayâtını temzîk edüp kurb-i kabr-i Hazret-i Hâlid'de dürr-i vücûdu defîn-i sadefçe-i mezâr ve aʿdâd-ı sinîn-i ömrü altmışsekiz raddesine müntehî olduğu resîde-i derece-i iştihâr (113-a) olmuşdur. Müşârün-ileyh âkil ve erîb kâmil ve edîb-i müteʿaffif-i gayr-i mutasallif-i mütekaşşif ve mütekeffif olup evzâʿ-ı rûzgâra mütehammil ve şiʿâr-ı sabr u şikib ile mütecemmil nev-hevesân-ı zamân misillû elbise-i fâhireye gayr-i mâil ve dâimâ kelâm-ı Hakk'ı kāil olup me'lûf-ı suhād derviş-nihâd oldu- ğundan gayri baʿzı meşâyih-i nakşibendiyye ve halvetiyyeden münîb ve tahsîl-i enfâs-ı kudsiyye ile sâlik-i meslek-i "Kün fi'd-dünyâ ke-enneke garîbün" olup leyl ü nehâr tesbîh ve ezkâr ile nefs-i emmâresini islâh u te'dîb ve kusvâ-yı merâm ve matlabı ve me'mûr olduğu hidemâtda peyk-i istikāmet pîşrev ve rehberi ve erbâb-ı masâliha rû-yı dil göstermek muktezâ-yı meşrebi olmağla kâffe-i nâs kendüden şâkir ve rifk u mülâyemeti beynlerinde ke'l-meseli's-sâir olup levs-i münkerâtdan dâmen-i ismeti pâk ve indinde iʿtibâr-ı nukûd kemter ez-kadr-i hâk hayatiyle teberrük ve teyemmün olunur bir pîr-i sâhib-idrâk idi.