Devlet-i kavî-şevket-i islâmiyyenin eşiddâ aʿdâsından olup sayf u şitâda rû-yı deryâda geşt ü güzâr ve süfün-i islâmiyyeye her bâr taʿarruzları bedîdâr olan Malta keferesinin mabîʿ-i iftihârları olup sercivân demekle meşhûr üç kıtʿa kebîr sefînelerinin birine Cezâyir-i garb korsanlarından iki kıtʿa sagīr sefîne tesâdüf etmekle bir-iki sâʿat kadar miyânede bahr-ı âşûb-ı harb cezr ü medd ve teyyâr-ı peykâr icrâ-yi muʿâmele-i ahz ü redd edüp bi'l-âhire gavvâsân-ı bahr-i magāzî ve melâhim olan kümât-ı muvahhidîn nâ'il-i dest-mâye-i (111-b) lûtf-ı hayy-i kadîr ve sefîne-i mezkûreyi bend-i kemend-i teshîr ve derûnunda olan müteʿayyin beyzâdeler ile bin kadar kefere esîr ve bu hâl-i zafer-iştimâl ile mersâ-yi Cezâyir-i garba lenger-endâz-ı selâmet oldukları taraflarından tahrîr ve tebşîr olundu. Bundan akdem mîrî gemilerinden kefere-i mesfûreye giriftâr olan sefînenin intikāmı alınmak hasran matlûb-ı hazret-i şehriyârî olduğu ânîfen zikr ü beyân olunmağla binâberîn bu esnâda işbu keyfiyyet-i pür-meserretin cilve-ger-i meclâ-yi zuhûr olması mahzâ eser-i teveccüh-i hazret-i zıllu'l-lâhî ve mukaddeme-i ahz-ı intikām olduğu zâhir ve bedîhîdir.