Mazalle-nişîn-i zîr-i himâyet-i mülûk-ı nasfet-sülûk olan nevʿ-i benî Âdem'in alâ-ihtilâf-ı tabakātihim birer ziyy ü şiʿâr ile kalemrev-i hükûmetlerinde imtiyâz ve taʿyînleri kānûn-ı küllî-i eslâf ve düstûrü'l-amel-i ahlâf olduğundan gayri bu devlet-i ebed-müddetde ez-kadîm bu âdet-i hasene muʿteber ve makbûl ve her sınıfa birer türlü kisvet ve libâs ihtisâsiyle yekdiğerlerden fark-ı küllî husûl bulmişidi. Bir müddetden berü bu kāʿide-i ceyyideye adem-i riʿâyet ve tavâif-i askeriyye ile esnâf-ı sâirenin beynlerini tefrîk ve temyîze küllî usret olduğundan gayri uğûr-ı dîn-i mübînde dâimâ cân-sipârî ve merdânegî izhâriyle şöhret-yâb ve nice nice gazavât ve cihâdda şemşîr-i adü-tedmîrleri bîgâne-i kırâb ve âşinâ-yi rikāb olan kümât-ı muvahhidînin vazʿ-ı vâzıʿ-ı evvel ile taʿayyün eden elbise-i mahsûsalarına ekkâr ve dehkāniyân ve keşâverzân ve zîr-destânın teşebbüh ve takallüdleri hürmet-i izzet-i askerîyi karîn-i izmihlâl ve nizâm-ı ecnâd-ı zafer-iʿtiyâdı (102-b) îsâl ma'raz-ı ihtilâl ve zevâl eylediği zâhir olup انزل الناس منازلهم misdâkı üzere fî-mâ-ba'd her sınıf kendüye mahsûs olan libâs ile mütemeyyiz ve maʿlûm ve ferd-i vâhid âharın kisvetine mulaʿ ve menhûm olmamak bâbında etrâf ve eknâfa ısdâr-ı emr-i nâfizü'l-mefhûm buyuruldu.