Mûmâ-ileyh Mustafa Paşa hazîne kâtibi iken bir-takrîb nâ'il-i rütbe-i hâcegânî ve câ-be-câ tahsîl-i menâsıb ve kesb-i atâyâ ve revâtib ile mâlik-i nisâb-ı emânî olup hattâ geçen sene küçük evkāf muhâsebeciliği ile mesrûr ve memnûn ve hîn-i azlinde bin guruş atiyye ile enbân-ı (101-b) âmâli memlû ve meşhûn olmuşidi. Binâberîn mukaddem ve muahhar hakkında mevc-rîz olan deryâ-yı âtıfet ve mekârime nazaran sâye-i Devlet-i aliyye'de birkaç etbâʿ ile ferâh ve fahûr müteʿayyiş ve icrâ-yı hükm-i tedbîr-i menzil ile nizâm-dâde-i dâd u dihiş olması lâzım iken tabîʿatinde merkûz olan rezâlet ve süfliyyet iktizâsıyla azl ü nasbı hâlinde dâ'imâ zıyk-ı ayşdan şikâyet ve rızk-ı maksûm-ı ezelîye adem-i kanâʿat ile baʿzı zî-câh ve servet olanlara arz-ı keşkûl-i deryûze-gerî ve tahsîl eylediği sîm ü zeri memkûr olduğu ahz ve itlâk-ı nisvâna sarf u istihlâk eylediğinden gayri nâil-i mansab olduğu hâlde bir kalpaklu hizmetkâr kullanmak muktezâ-yı hıbs-i siyreti ve hîn-i azlinde hânesinde horasânîyi giyüp münferiden ve mâşiyan Bâbıâlî'ye gelmek âdeti ve işbu mağbût-ı enâm olan tarîka ihâneti te'dîb ve gûşmâlini her bâr îcâb eder iken bu âna dek vazʿ-ı nâ-becâsından iğmâz ve mücâzât-ı tavr-ı garîbânesinden iğrâz olunmuşidi. Merkūm bu esnâda zarûretinden bahs ile birkaç defʿa rikâb-ı kâmyâb-ı hüsrevâneye refʿ-i rukʿa-i iştikâ ve cerr-i menfaʿat kasdiyle tarîk-i ehl-i gedyeye intisâ ve iktidâ eylediğine kanâʿat etmeyüp huzûr-ı sadr-ı vakūra varup fakr u fâkeden şikâyet ve cüz'î ve küllî tarafından Devlet-i aliyye'ye bir hizmet sebkat etmemiş iken emekdarlık iddiʿâsiyle hâric ez-hadd tasdîʿa mübâderet etmekle bu makūle semt-i hırs u tamaʿa sâlik ve rezâlet ile celb-i menâfiʿe mütehâlik (102-a) olanlardan tarîki tathîr ve tenkîh ve tesâvî-i tabîʿatle merkūma muʿâdil baʿzı kimesnelere, [Mısra]: اليك اعنى فاسمعي ياجارة meʿâlini ibâne ve tavzîh lâzım geldiğine binâen hâcegân defterinden ismi hakk olunup Bursa'da ikāmetine irâde-i aliyye cereyân ve taʿayyüşüne medâr olmak üzere Bursa mîzân-ı harîrinden yevmî altmış sağ akçe vazîfe ihsân olundu.