Sâbıkā Devlet-i aliyye-i ebediü'l-karârda öteden berü te'dîb ü gûşmâlik merâtib-i mu'ayyene ve hudûd-ı mukannenesi olup binâen-aleyh esâtîn-i dîn-i kavîm ve reh-nümâyân-ı tarîk-i müstakīm olan ulemâ-i a'lâm ve meşâyîh-i kirâmdan bi-hasebi'l-beşeriyye bir gûne hefve ve kusûr serzede-i vukū' u zuhûr olur ise dahi efrâd-ı nâs ve evgad-ı nâ-sipâsa teşbîh ve kıyâs ile mazhar-ı ukūbât-ı şedîde olmaları bu devlet-i kavî-şevketde nâdir ve ekser hacr ü tağrîb ile ıslâh ve te'dîb oluna-geldikleri kâ'mis-üd-dâr zâhir iken bundan akdem Beyşehri mutasarrıfı olup mîrimîrândan Memiş Paşa-zâde Bekir Paşa tesvîlât ve hevâcis-i nefsâniyyeye ittibâʿ ve rükûn ve baʿzı erbâb-ı bağy ü şakāvetin mekr ü âline dil-beste ve meftûn olup mahzâ hass u iğrâlarıyle müftî-i belde olan Mahmud Efendi'yi bi-gayr-i hakkın katl ü izâle ve evlâd u iyâlini tazyîk ve izdirâ ile emvâl ü eşyâsına dest-i taʿarruz ve hırsı itâle eylediği haberi dârü'l-adl ve'l-amân olan der-i devlet-medâra vusûl bulduğu anda istiknâh-ı hakîkat-i hâl zımnında emr-i celîü'ş-şân mahsûs mübâşir ile mahalline tisyâr olunmuşidi. Me'mûr-ı mezkûr mahall-i merkūma lede'l-vusûl husûs-ı mezkûru kemâ-yenbağî taharrî ve tedkîk ve efendi-i mûmâ-ileyh (101-a) bilâ-mûceb katl olunduğun tahkîk ve Der-ʿaliye'ye arz u tanmîk eyledikde paşa-yı bî-akl ü şuʿûr ve kendü ile bu husûsda müttefikü'l-kavl olan ashâb-ı fitne ve şûr bilâ-emân müsta'sal ve makhûr olmak bâbında mukaddemâ fermân-ı kazâ cereyân şeref-yâfte-i sudûr oldukda madde-i katilde medhal-i azîmleri olan eşhâs şemşîr-i siyâset-i hazret-i pâdişâhîden rehyâb-ı vâdî-i halâs olmayacakların teyakkun ve vilâyetlerinde adem-i temekkün ile her biri birer semte firâr ve ihtifâ eyledikleri inhâ olunmağla firârîleri sayd içün bast-ı hibâle-i hüsn-i tedbîr ve fakat paşa-yı merkūmun Konya kalʿasına vazʿıyla iktifâ olunduğu me'mûrlar taraflarından halka işâʿa ve teşhîr olunmuşidi. Zikr olunan firârîler bir müddetden berü cüst-cû ve iftihâs ve bir vechile iktinâs olunamadıklarından tertîb-i cezâları vakt-i âhara ta'lîk ve şimdilik paşa-yı merkūmun câme-i müsteʿâr hayatı ser-pençe-i kahr-ı sultânî ile temzîk olunup ser-i maktūʿu Âsitâne'ye vürûd ve luḥûmu'l-ʿulemâʾi mesmûmetün sırrı erbâb-ı ibret ve basîrete perde-şikâf-ı şuhûd oldu.