Hazîne baş vekîli olup bundan akdem si'âyet-i rukebâ ve isâ'et-i ehl-i iftirâ ile der-i devletden dûr ve Medîne-i münevvere alâ-sâkinehâ efdalü't-tahiyyede du'â-yı bekā-yı ömr ü devlet-i şehinşâhî ile güzârende-i eyyâm ü şuhûr olan Beşîr Ağa'nın sebkat eden hizmet ve sadâkati hâtır-güzâr-ı şehriyâr-ı Cem-iktidâr olmakdan nâşî bundan akdem münhal olan hazînedarlık hizmet-i celîlesiyle ibcâl ve hâsseten da'veti zımnında irsâl-i berîd-i isti'câl kılınmışidi. Ağa-yı mûmâ-ileyh tayy-ı merâhil ve kat'-ı menâzil eyleyerek Âsitâne-i sa'âdet'e vusûl ve doğru Bâbıâlî'ye nüzûl edüp bu makūle hidemât-ı cesîme tevcîhinde ilbâs olunan hil'at, taraf-ı mîrîden ola-geldiği zâhir iken mahzâ ağa-yı mûmâ-ileyhi taltîf ve tevkîr zımnında taraf-ı sadâret-penâhîden gayet a'lâ bir ferve-i semmûr müstevcibü's-sürûr kāmet-i liyâkat ve istîhâline iksâ ve hizmet-i (100-b) müstelzimü'l-behcet dâver-i gerdûn-gulâmda kemâ-kân izhâr-ı sıdk u istikāmet eylemesi ve vesâyâsı gûş-i hûşuna ilkā birle Saray-ı âmire'ye ba's ü isrâ olundu.