Erzurum vâlîsi vezîr Timur Paşa'nın mîrimîrânlığı hengâmında âfâk-gîr olan şöhret-i şâyiʻası iʻtilâ-yı kadr ü câhına sebeb ve irtifâʻ-ı derece-i şân ve unvânına vesîle-i akreb olup kusâvâ-yı merâtib-i beşeriyye olan rütbe-i vezârete nâ'il ve mâh-ı ümîdi hilâl iken bedr-i kâmil olduğundan gayrı eyâlet-i Erzurum behcet-i lüzûm gibi rahbü'l-enhâ ve kesîrü'l-nemâ'ir mansıb-ı celîl ile tebcîl ve kühlü'l-cevâhir iʻtibâr-ı evliyâ-yı devlet ile çeşm-i kelîli tekhîl olunmuşidi. Müşârün-ileyh teveccüh-i ikbâl-i dünyâ-yı denî vü dûne ferîfte ve mağrûr ve sıfât-ı şeytâniyyeden olan ucb ü istikbâr ile az zamanda maʻrûf ve meşhûr olup öteden berü tavʻ u inkıyâdları nakş ber-âb wal-hukmu liman galaba semtine zehâb âdet-i nâ-savâbları olan ümerâ-yı ekrâd ve eclâf-ı kabâ'il-i müstaʻidü'l-fesâd ile muʻâmele bi'l-mücâmele kāʻidesine adem-i iʻtinâ ve me'lûf oldukları dest-nevâzî-i rıfk u mülâyemetden dâmen-efşân-ı enef (99b) ü istiğnâ olduğundan gayrı tavr-ı vezârete mahall baʻzı evzâʻı şuyûʻ ve ol-havâlide rü'yeti mühim olan umûr-ı devletde tehâvün ve taksîri mesmûʻ olduğundan mahzâ tecrübe-i dekāyık-ı umûr ve azmâyiş-i ahvâl-i cumhûr etmesi dâʻiyesiyle terbiye ve ıslâhı maksûd ve Erzurum'dan azl ve İçel sancağına vasl ile çartak-ı iltifât-ı devletden sâkıt ve matrûd olup eyâlet-i mezkûre bundan akdem vezâreti refʻiyle Darende'de ikāmetine irâde taʻalluk eden sadr-ı esbak Mehmed Paşa hazretlerine işbu şehr-i merkūmun onaltıncı günü tevcîh ve ihsân ve ol-havâlide vâkiʻ kâffe-i serhaddât ve memâlikin intizâm-ı ahvâline vakt-i tâmm ve cemʻ-i eştât-ı umûruna kemâ-yenbağî ihtimâm etmek bâbında emr ü fermân ve Karesi sancağı mutasarrıfı olup bir müddetden berü Âsitâne-i saʻâdet'de manassa-nişîn-i ikāmet ve ârâm olan vezîr-i mükerrem Esseyyid Mustafa Paşa hazretlerine eyâlet-i Sivas tevcîh ve bir an akdem mansıbı semtine sevk-i matâyâ-yı istiʻcâl eylemesi tenbîh ve Boğdan başbuğu olup Ohri sancağına ber-vech-i arpalık mutasarrıfı olan vezîr-i mükerrem Ahmed Paşa hazretlerinin eyâlet-i Haleb ile dâ'ire-i ahvâli tevsîʻ ve terfîh olunup selefi vezîr-i mükerrem Silâhdâr Mustafa Paşa hazretleri dahi melhûz-ı lihâza-i birr ü inʻâm ve Karesi ve Sultanönü sancaklarıyla nâ'il-i merâm ve Âsitâne-i saʻâdet'e gelmek ruhsatına neyl ile bekâm olup Ohri sancağı mîrimîrân-ı kirâmdan İskenderiyeli Mehmed Paşa-zâde Ahmed Paşa'ya ve İnebahtı (100-a) ve Resmo sancağı mutasarrıfı Anabolulu İbrâhîm Paşa'ya tevcîh ve inâyet ve selefi vezîr Silâhdâr Emin Paşa'ya ve Azm-zâde kethüdâlığından neş'et ve bir-takrîb ihrâz-ı rütbe-i vezâret eden İbrâhîm Paşa'nın bu âna dek vâlî oldukları eyâlât ve elviyede etvâr-ı sütûdeye muvaffak olamadıklarından câme-i vezâret kāmetlerine nâ-çespân ve vezâretleri ref'iyle birer mahalde îvâ ve iskân olunmaları kendü haklarında dahi mahz-ı hayr olduğu vâreste-i kayd-ı beyân olmağla sıfr-ı zâ'id mesâbesinde olan isimleri cerîde-i vüzerâdan hakk ve sütürde ve Emin Paşa Filibe'de ve İbrâhîm Paşa Niğde'de pister-i ikāmeti güstürde etmek bâbında ısdâr-ı emr-i celîlü'l-i'tibâr kılındı.