İbbân-ı civân ve sabâ ve ünfüvân-ı ömr-i girân-bahâda tahsîl olunan ilm ü hüner sahâif-i ezhânda ke'n-nakş fi'l-hacer müte'essir ve kârger olacağı ind-i ehlü'n-nazar müsellem ve muʿteber olduğundan gayrı taʿallüm-i efânîn-i ulûm ve tefehhüm-i kavânîn ü rüsûm tehî-destân-ı enâma (96-a) sermâye-i dükkânçe-i maʿîşet ve vesîletü'l-husûl-ı rızk u kısmet olduğu gibi ezâhîr-i hadâik-i saltanat u bahtiyârî olan şehzâdegân hazerâtına dahi ârâyiş ü ziynet ve zerîʿatü'z-zabt-ı serâir-i mülk ü millet olduğu hâlâ evrenk-nişîn-i hilâfet ve tâcdârî ve dîhîm-i efrûz-ı bâlâ-hâne-i şevket u kâm-kârî olan Şehriyâr-ı müstahsenü'l-âsâr ve şehinşâh-ı İskender-vakār hazretlerinin zamîr-i münîr gîtî-izâetlerinde aks-endâz-ı mir'ât-ı vuzûh olup binâberin el-hâletü-hâzihi tertîb-kerde-i âgûş-ı saltanat ve perveriş-yâfte-i hadâne-i izz ü şevket olan şehzâde Sultan Süleyman dâme fî-avni'l-müste'ân ve şehzâde Sultan Mustafa رزق له السعادة والمنى hazerâtının idrâk-i maʿkūlât ve mahsûsât ve iktisâb-ı nazariyyât ve zarûriyyâta istiʿdâd-ı mahzları ke'ş-şems fi'l-hevâcir mütebeyyin ve kābiliyyet-i fıtriyyeleri ke'l-bedri'z-zâhir müteʿayyin olduğuna binâen ravzatü'l-igmâ-yı ulûm-ı mütenevviʿadan iktitâf-ı verd-i tarıyy-i maʿârif ve hadîka-i enîka-i kemâlât-ı şettâdan ictinâ-yı bâkûre-i letâif buyurmalarına irâde-i kerâmet-ifâde-i mülûkâneleri cereyân وعلمو الأولادكم kelâm-ı hikmet-intizâmına intisâ ve iktidâ ile revâc-dâde-i fenn-i kâsid-i hüner ü irfân olmalariyle felihâzâ işbu Rebîʿülevvelin beşinci günü sadrıazam-ı âlî-makām ve şeyhülislâm-ı benâm ve vüzerâ-yı izâm ve sudûr-ı kirâm hazerâtı ve ricâl-ı bâb ve sâir hademe-i dergâh-ı felek-cenâb Saray-ı âmire'ye kemâl-i sürûr ve beşâşet ile teveccüh ve azîmet ve İncilü köşk pîş-gâhında birkaç gün mukaddem nasb olunan otak-ı süreyyâ-nitâk ve hiyâm (96-b) ve çergelerde cüz'î istirahat akabinde hân-ı vâsiʿü'n-nevâl-i mülûkâne bast olunup müfti'l-enâm-ı sellemehü's-selâm ve ağa-yı Dârü's-sa'âdetü'ş-şerîfe ve vüzerâ-yı ʻizâm hazerâtı cenâb-ı sadrü'l-vüzerâ hazretlerine tahsîs olunan sofrada it'âm ile karîn-i i'zâz ve ihtirâm ve erkân-ı devlet-i ebed-müddet dahi haymelerinde Matbah-ı âmire'den ihzâr ve âmâde kılınan et'ime-i şehiyye-i mülûkâne ile ikrâm olundukları esnâda rûh-ı cism-i mülk u millet ve mühr-i burc-ı übbehet ve menzilet olan şehenşâh-ı âlî-tebâr vekāhu'llâhu ani'l-âfât ve'l-ekdâr hazretlerinin kudûm-ı meyâmin-lüzûm-ı mülûkâneleri haberi teşrîf-sâz-ı sâmia-i huzzâr olup der-akab destûr-ı vakūr ve şeyhülislâm-ı maʿâli-mevfûr hazerâtı ve sâir mevcûd olan zevât-ı dîvân-ı adâlet-nişâna muhtass olan elbise ve eksiye ile şâh-râh-ı intizârda saf-beste-i ârâm ve nîm-nigâh-ı hazret-i pâdişâhîye neyl ümidiyle mevkif-i tazarruʿ ve meskenetde kıyâm etmeleriyle çok geçmeden pâdişâh-ı Dâd-âver misâl-i hûrşîd-i enver etrâf ve eknâfa sâye-güster ve müsteşrifân-ı cemâl-i bâ-kemâl-i mülûkânelerine bahşende-i ziyâ ve fer olup derhal sadrıazam hazretleri kemâl-i ibtihâl ile icrâ-yı merâsim-i istikbâl ve gubâr-ı semend-i bî-mânend-i pâdişâhîye sürme-i çeşm-i ikbâl ve i'tibâr ve zürûr-i ayn-i şeref ü iftihâr edüp rahş-ı dil-keş-i düldül ve şüden-i seng-i rikâba vazʿ-ı kadem buyurduklarında müşârün-ileyh hazretleri kasr-ı hümâyûnda mansub olan taht-ı âlî-bahta dek hizmet-i bagal-gîrî-i mülûkâne ile mübtehic ve mesrûr ve iltifât-ı şehriyâr-ı bende-nevâz ile hâiz-i rehîne-i (97-a) hubûr olduğu esnâda âlây-ı vâlâ dahi cemîʿ esbâb ve levâzımiyle tertîb ve tekmîl olunmuş olmağla sadrıazam-ı kaviyyü'l-himem ve şeyhülislâm-ı fazâil-şiyem hazerâtı [Kefere-i rûmân-ı evker-i dıy'at-ı lebân] hem-inân olarak müretteb âlây ile Orta kapu'ya teveccüh ve nüzûl ve mâşiyân Arz kapusu'na vusûl ve tülânî soffada erbâb-ı âlây alâ-merâtibihim kuʿûd ve kudûm-i şehzâdegân-ı civân-bahtâne medd-i hayt-ı şuʿâʿ-ı çeşm-i şuhûd eylediler. Rubʿ sâʿat mürûrunda nevres-nihâlân-ı hadîka-i hâssü'l-hâss-ı sultânî ve nev-bâvegân-ı ravzü'l-ünf-i cihân-bânî olan şehzâdegân medde'llâhu zıllehumâ mâdâme'l-Ferkadâm hazerâtı ser-i saʿâdet-efserlerinde mücevher sorguçlar ve beyaz şîbe kaplu kapanice kürkler elmas ile müzeyyen esbler ile Bâbüssaâde'den mânend-i neyyireyn-i zâhireyn lemʿa-pâş-i hâfıkayn olmalariyle murassaʿ rahleler üzerinde murassaʿ kîselere mevzûʿ mutallâ al pûşîdeli Masâhif-i şerîfelerini lalaları kemâl-i âdâb ile istishâb ve pîş-gâh-ı necîbânelerinde revân ve Dârüssaʿâde ağası ve hazînedâr ağa hazerâtı yemîn ü yesârlarında selîmî ve erkân kürkler ile ber-çîde-dâmen-i emr ü fermân olmalariyle dîdene-i kadîme-i Devlet-i aliyye üzere ibtidâ şerâfetlû nakîbü'l-eşrâf efendi hazretleri ber-dâşte-i dest-i duʿâ baʿdehû sadr-ı âlî-kadr hazretleri ve şeyhülislâm ve vüzerâ-yı ʻizâm ve ulemâ-yı aʿlâm hazerâtı dest-bûs-i şehzâdegân-ı saʿâdet-me'nûs ile iktisâb-ı behcet ü behâ ve râcilen Orta kapu'ya dek ale't-tertîb pîş-gâh-ı sa'âdetlerinde rehn-everd ve ba'dehû herkes suvâr-ı rehvâr ü semend olup tertîb-i ma'lûm ile İncili köşk'e karîb geldiklerinde (97-b) erbâb-ı âlây bi'l-cümle cânib-i yesârda kasr-ı hümâyûna varınca râkiben saf-ârâ-yi selâm ve sadrıazam ve şeyhülislâm hazerâtı esblerinden nüzûl ve seng-i rikâbda kıyâm etmeleriyle şehzâdegân hazerâtı dahi haşmet-i tamm ve debdebe-i mâlâ-kelâm ile mevkif-i selâmda yek-cünbüş-i ebrû-yi iltifâtlarına dîde-küşâ-yi terakkub olan bende-gânı lahazât-ı peyder-pey mekârim ile taltîf ve seng-i rikâba teşrîf buyurduklarında sadrıazam hazretleri şehzâdegân hazerâtını birer birer ârâyiş-i âtik-i mubâhât eyleyerek huzûr-ı mevâhib-mahsûr-i hümâyûna îsâl ve ba'dehû kasr-ı hümâyûn etrâfında vâkiʿ sofada zânû-zede-i câh u ikbâl ve mutarassıd-ı ruhsat-ı pâdişâh-ı deryâ-nevâl olduğu hâlde izn ü ruhsat-ı şehinşâhî erzânî buyurulup sadrıazam ve şeyhülislâm ve vüzerâ-yi ʿizâm ve ulemâ-yi aʿlâm dâmen-bûs-i hazret-i şehriyârî ile şeref-mend ve yeniçeri ağası ve defterdâr efendi ve kapu ricâli müntehâ-yi medâ-yi basar olan mahalden birer temennâ ruhsatına kāniʿ ve hursend oldular. Bundan sonra sadrıazam hazretleri şehzâdegân hazerâtını zîver-âgûş-i ihtirâm eyleyerek kasr-ı hümâyûnda mebsût olan ihrâm üzerine ik'âd ve şeyhülislâm-ı fezâ'il-muʿtâd hazretleri dahi rahlenin berü cânibinde mevzûʿ olan ihrâm üzerinde kemâl-i âdâb ile ku'ûd ve taʿlîm-i istiʿâze ve besmeleye bed' ü mübâşeret edüp ba'de't-taʿlîm yine âsaf-ı mekârim ve şîm gāyet-i tevkîr ü taʿzîm ile şehzâdegân hazerâtını mahallerine îsâl ve teslîm eylediği hâlde (98-a) şeyhülislâm efendi hazretleri ve Ayasofya şeyhi dergâh-ı hâlik-i bî-enbâze refʿ-i eküff-i ibtihâl ve deymûmiyyet-i eyyâm-ı ömr ü devlet-i pâdişâh-ı kader-tevân ve kaymûmiyyet-i hengâm-ı aʿmâr-ı şehzâdegân-ı âlî-şân zımnında edʿiye-i icâbet-der-kafâyı ikmâl eylediler. Ba'dehû şehinşâh-ı bâhirü'l-kerem ve'l-cûd sadr-ı azîzü'l-vücûdların serâsere duhte ferve-i semmûr ile hâ'iz-i kadeh-i muʿallâ-yi ibtihâc ve sürûr ve şeyhülislâm selleme-hü's-selâm hazretlerini dahi beyâza kaplu semmûr kürk ile nâ'il-i hubûr ve kezâlik Dârü's-saʿâdetü'ş-şerîfe ağası hazretleri mazhar-ı lûtf-ı tâcdârî ve serâsere kaplu ferve-i semmûr ilbâsıyla kadr ü şânı âlî buyurulup sudûr-ı kirâm ve imâmeyn ve Ayasofya şeyhine ferâce semmûr kürkler ilbâs ve otak-ı asafîde yeniçeri ağası ve defterdâr efendi ve sâirlere ber-mûceb-i defter hilʿatler iksâsıyla derece-i iʿtibârları felek-nümâs kılındıkdan sonra şehzâdegân hazerâtını tertîb-i sâbık üzere Orta kapu'ya îsâl ve ba'dehû mâşiyen kubbe-i hümâyûn ittisâlinde vâkiʿ Harem-i hümâyûn kapusu pîşgâhında ale't-tertîb erbâb-ı âlây kıyâm ve müşârün-ileyhimâ hazerâtının mükerreren iltifâtlarına mazhariyyetle nâ'il-i aksa'l-gāye-i merâm oldular. Ba'dehû şehzâdegân hazerâtı Harem-i hü- mâyûn'a azîmet ve herkes mahallerine inân-tâb-ı mürâcaʿat oldular. Cenâb-ı âferînende-i benî âdem ve fermân-fermâ-yı ʿale'l-insâni mâ-lem yaʿlem tenezzehe zâtühû ʿani'l-meleli ve's-sekami hazretleri halîfetü'l-müslimîn ve hâmî-i havme-i şerʿ-i mübîn olan pâdişâh-ı ʿadâlet-karîn hazretlerini ilâ-yevmi'l-kıyâm zafer ü nusret ve kemâl-i sıhhat ve ʿâfiyet ile taht-ârâ-yı bekā (98-b) ve devâm edüp zerârî-i tayyibetü'l-aʿrâk-ı şâhânelerin mütekessir ve efzûn ve her birini neyl-i emânî ve maksûd ile memnun edüp ʿale'l-husûs el-hâletü hâzihi zîb-ârâ-yı ʿâlem-i vücûd ve ziynet-i dehende-i manassa-i şuhûd olan şehzâdegân hazerâtını âfât-ı semâviyye ve araziyyeden masûn ve sâlim ve tûl-i aʿmâr ve husûl-i âmâl ve evtâr ile sâbit ve dâ'im eyleye, âmîn, Nazm: Ve hâzâ duʿâ'un lâ yuraddu li'ennehû / Duʿâ'un ʿalâ külli'l-beriyyeti şâmilün