Delvine sancağı mutasarrıfı olup mîrimîrân-ı kirâmdan Mustafa Paşa'nın sâkin olduğu mahalle leylen ba'zı eşkıyâ duhûl edüp mûmâileyhi katl ü i'dâm ve mevcûd olan zî-kıymet eşyâsını nehb ü gāret eylediklerini ahâli-i belde mahzar ve kadısı i'lâm etmekle bu makūle fitne ve fesâda cesâret ve nasb-kerde-i halîfetü'l-müslimîn olan vulât ve hükkâma itâle-i dest-i şakāvet edenlerin cezâları tertîbiyle sâir eclâf-ı nâs terhîb olunmak Kānûn-ı küllî-i siyâset-i mülkiyyeden olduğuna binâen kātilleri teftîş ve istihbâr ve cezâ-yı mâ-yelikleri icrâsiyle def'-i ihtilâl-i beldeye ibtidâr ve mûmâileyhin gasb olunan hasîs ve nefîs emvâl ve eşyâsı zâhire ihrâc ve bu vesîle ile sâir bî-garaz kimesneler min-gayr-i vech tazyîk ve iz'âc olunmamak bâbında (95-b) hâlâ Avlonya sancağı mutasarrıfı Kürd Ahmed Paşa'ya ve Rumeli kāymakāmına isdâr-ı fermân-ı âlî-şân kılınup münhal olan Delvine sancağı işbu Rebîülevvel gurresinde avâtıf-ı aliyye-i mülûkâneden Aydonatlı Abdurrahman Paşa'ya tevcîh ve inâyet ve me'mûrlara i'ânet etmesi husûsu mûmâileyhe gereği gibi tenbîh ve işâret olundu.