Dımışk-ı Şam eyâletine tâbiʿ Havran nâhiyesinde Eski-Şam demekle maʿrûf Busrâ nâm kalʿada mevcûd eser-i kadem-i muhterem-i hazret-i şefîʿ-i rûz-i cezâ ve nakş-ı pây-i cenâb-ı ser-hayl-i enbiyâ aleyhi efdalü't-tehâyâyı keşîde-i sîne-i iftihâr ve nihâde-i suveydâ-yı dil-i şeref ve iʿtibârı eden hacer-i iʿcâz-eseri Şam vâlisi esbak müteveffâ Vezîr Mehmed Paşa mahall-i mezkûrdan kalʿ ve müteveffâ Esʿad Paşa'nın hânesine nakl ve vazʿ eylediğini hâlâ Şam vâlisi vezîr-i mükerrem Derviş Mehmed Paşa bu defʿa arz u tahrîr ve Câmiʿ-i Emeviyye'de vâkiʿ merkad-i muʿattar-ı Hazret-i Yahyâ Aleyhüsselâm'da cümle-i âsâr-ı hayriyye-i hazret-i tâcdârîden olarak müceddeden bir mahall binâsiyle ikāmesi veyâhud suhûlet-i nakl hasebiyle Âsitâne-i saʿâdet âşiyâneye celb olunmasını ifâde ve tezkîr etmekle Dârü's-saltanatü'l-aliyye'de bu makūle âsâr-ı şerîfe ve teberrükât-ı latîfenin vücûdu mahz-ı hayr u bereket ve vesîletü'l-husûl-i yümn ü saʿâdet olduğu havâli-gerd-i zamîr-i ilhâm-tahmîr-i şehriyârî olduğuna binâen zikr olunan Hacer-i şerîf bu cânibe nakl olunup Âsitâne-i saʿâdet'de müceddeden ihyâ ve binâ olunan türbe-i şerîfenin bir mahall-i münâsibine vazʿ u taʿlîk ve ziya- ret-gâh-ı erbâb-ı kulûb ve tahkīk olmak üzere Şam vâlîsine hitâben isdâr-ı emr-i celîlü'l-i'tibâr kılındı. Kadem-i şerîf'in zikr olunan hacere te'sîri keyfiyyetine tahsîl-i ıttılâ' içün tetebbû'-ı kütüb-i magâzî ve siyer ve istintâk-ı ehl-i hadîs ve eser kılınup Halebînin İnsânü'l-uyûn nâm siyer-i makbûlünde İmâm Sübkînin (95-a) meşhûr olan Kasîde-i tâiyye'sinde, [Mısra:] "و اثر في الاحجار مشيدة / ثم لم يوثر في رمل ببطحاء مكة" beyti sahîfe-zîb-i beyân ve İmâm Suyûtînin Hasâis-i suğrâ nâm kitâb-ı müstetâbında "ولاو طى على حجر الا و اثر فيه" ibâresi nûr-fezâ-yı merdümek-i tahkīk ve îkān olup ancak kabûl-i isr eden hacer ıtlâk üzere mezkûr ve muharrer ve husûsiyle vukū'-ı isre delâlet eder bir ibâre-i sarîha ve bir rivâyet-i sahîhaya her-çend zafer mümkin olmadı ise dahi "لو اعتقد ثم على حجر التفكم" mefhûmu üzere nakş-ı Kadem-i Fahr-i kâinât aleyhi efdalü't-tahiyyât i'tikādiyle ihtirâm ve i'zâzı yümn ü bereketden hâlî olmadığı zâhirdir.