Kuds-i şerîf ve Nablus sancakları ilhâkiyle hâlâ Şam vâlisi ve mîrü'l-hac olan vezîr-i mükerrem Derviş Mehmed Paşa hazretleri bu sâl-i meyâmîn-iştimâlde muktezâ-yı me'mûriyyeti üzere hüccâc-ı zevi'l-ibtihâcı bi-fazlihi subhânehu ve te'âlâ Mekke-i mükerreme'ye kemâl-i itmi'nân ve refâhiyyet ile îsâl ve iskāt-ı farîza-i hacc ve itmâm-ı lâzıme-i acc ü secc akībinde Şam-ı cennet-meşâma mashûben bi's-selâma idhâl eylediği bu esnâda meserret-resân-ı vürûd olan tahrîrâtından müstebân olduğundan gayri cerde başbuğluğiyle hâlâ Trablus-Şam beylerbeyisi olan birâderi Hasan Paşa dahi vaktiyle hüccâc-ı hidâyet-minhâcı istikbâl ve hizmet-i lâzımesinde sarf-ı mâ-hasal-ı iktidâr eylediği hüsn-i terbiye-i hazret-i âsaf-ı hamîdü'l-hasal ile maʿrûz-ı atabe-i hüdâvend-i deryâ-nevâl kılınmağla saʿy ü himmetleri mebrûr ve hizmet ve gayretleri meşkûr olup zalâm-ı şâm-ı halecân-ı kalb ile târîk olan hâne-i ümidleri pertev-i âfitâb-ı şehriyârî ile pür-nûr u ziyâ ve işbu Rebîʿü'l-evvel gurresinden kemâkân mansıbları takrîr (94-b) ve ibkā olundu.