Devlet-i aliyye-i ebediyyü'l-kıyâmm esbâb-ı ceng ü peykârı henüz verâ-yi cidâr-ı nâ-tamâmî (93-b) ve noksâniyetde mütevârî olduğuna binâen a'dâ-yı dînin Kırım ve sâir mevadda zuhûra gelen teklîf-i anîflerine bâlâda tafsîl ve beyân olunduğu üzere zarûrî mümâşât ve baʿdemâ kümmeleti'l-esbâb ahz-i sâr ü intikām kasdiyle taraf taraf diyâr-ı nikbet-medârlarına sevk-i mücâhidîn ve guzât hülâsa-i efkâr-ı kâr-güzârân-ı devlet olduğu eğerçi maʿlûm-ı şehriyârî olup ancak kesîr ü kalîl ve dakīk ü celîl umûr-ı hümâyûnlarını şerʿ-i şerîfe tatbîk muktezâ-yı meslek-î müstevcibü't-tevfîkleri olmağla binâen-aleyh yâverî-i avn-i hazret-i hayrü'n-nâsırîn ve meded-kârî-i rûhâniyyet-i cenâb-ı seyyidü'l-mürselîn ile mukābele ve mukāteleye istiʿdâd-ı tâm geldikde fesh-i râbıta-i âştîye mesâğ-ı şerʿ-i şerîf ne vechiledir deyû beyaz üzerine keşîde bir kıta hatt-ı hümâyûn-ı hikmet-meşhûnlariyle istifsâr buyurduklarında müsteşrif-i avâkıb-ı umûr ve müte'emmil-i habâyâ-yı ahvâl-i cumhûr olan sadrü's-sudûr tarafından ise bu husûs mukaddemâ istiftâ ve semâhatlû şeyhülislâm efendi hazretleri dahi ulemâ-i alâm ile bi'l-müzâkere iʿtā-yı fetvâ etmiş bulunmalariyle zikr olunan fetvâ-yı şerîf bu defʿa taraf-ı pür-şeref-i hilâfet-penâhîye arz u takdîm ve me'âl ü muhassalı mersûm-ı sahîfe-i tabʿ-ı müstakīmleri buyuruldukda sandukça-i kitmân ve istitâre vazʿ u ilkā ve hükmünü icrâ liyâkatini cenâb-ı kahhâr-ı müntakimden niyâz ile refʿ-i eküff-i duʿâ buyurdular.