Bundan akdem Moskov ve Nemçe elçilerinin devletleri taraflarından me'mûren Bâbıâlî'ye takdîm eylediği takrîrlerinde münderic olan mevadd-ı selâsenin ikisi hitâm-pezîr ve diğeri ki Eflâk ve Boğdan maddesidir, bu âna dek te'hîr olunmuşidi. Zikr olunan maddenin dahi kat' u nizâmı hasm-ı mekkârın hülâsa-ı merâmı olduğundan gayri Devlet-i aliyye tarafından mevadd-ı selâsenin kabûlü zımnında mukaddemâ sened verilmiş olmağla ba'zen mükâleme ve ba'zen muhâbere ile işbu madde dahi tanzîm olunup keyfiyyeti maʿlûm olmak içün makām-ı sadâret-i uzmâdan verilen senedin me'âli alâ-tarîki'l-icmâl tahrîr olundu. Bin yüz seksensekiz senesinde Eflâk ve Boğdan'dan vürûd eden boyarların iltimâslariyle hatt-ı hümâyûn-ı şevket-makrûn ile müveşşah inâyet ve ihsân olununan evâmir-i aliyye icrâsı taahhüdüyle Eflâk'dan altı yüz ondokuz kise ve Boğdan'dan yüz otuzbeş kise ve dört yüz kırkdört buçuk guruşdan ziyâde beher sâl cizye mutālebe olunmayup zikr olunan mebâliği getürüp Âsitâne-i saʿâdet'e teslîm edeler ve müceddeden nasb olunan beylerden cevâiz taleb olunmayup, anlar dahi reʿâyâdan bu bahâne ile akçe tahsîl etmeyeler, ve Eflâk memleketinden îdiyye nakd ve eşyâ, doksan bin rikâbiyye kırk bin ve Boğdan'dan îdiyye doksan bin ve rikâbiyye yirmibeşer bin guruş almup ibkāiyyeyi memleketeyn beyleri reʿâyâya tevzîʿ (93-a) etmeyüp kendülere âid olan menâfiʿ-i rüsûmât ve gümrük ve sâir vâridât-ı muʿayyenelerinden edâ edeler ve ol havâlide olan vülât ve hükkâm iddiʿâ-yi hâsse, ve zararı reʿâyâya râciʿ avâid taleb etmeyüp ve mücerred akçe ve hediyye celbi içün mübâşir göndermeleri Devlet-i aliyye tarafından tecvîz olunmamak ve Devlet-i aliyye'de birisi mansûb oldukda memleketden avâid ve cevâiz verilmeyüp hubûbât ve zehâir-i sâire dahi ahâliye mûcib-i muzâyaka olmayacak derecelerde ahz ü iştirâ olundukda mîrîden an-nakd akçesi edâ ve nakliyyesi ahâliye tahmîl olunmaya ve tüccâr tarafından alındığı hâlde râyic olduğu vech üzere alınup taʿyînât-ı mîriyye ve sekene-i İstanbul içün füruht olunacak ağnâmı siʿr râyiciyle tüccâr ve celeblere voyvodalar nezâretleriyle füruht edeler ve Devlet-i aliyye'ye lâzım olan kereste ve sâir levâzım-ı ebniye mukaddemce beylere ihbâr ve katʿiyye ve nakliyyeleri reʿâyâya el-verecek vechile nakden edâ ve hudûddan hâric mahallere nakl etdirilmek bâbında cebr olunmamak ve memleketeyn-i mezkûreteynden araba ve amele mutālebe olundukda ücret-i âdiyelerini tenkîs ve te'hîr câiz olmayup fermânlu tüccârdan gayri yamâkān ve etrâfdan ızrâr dâʿiyesiyle bir ferdin geşt ü güzârları ve topraklarında hars u ziraʿat ve raʿy-i hayvanât etmeyeler.