Bi-ismihî subhânehû ve te'âlâ bâ'is-i tenmîk-i hurûf oldur ki Devlet-i aliyye-i Osmâniyye ile Rusya Devleti imparatoriyesi beyninde der-kâr olan hüsn-i muvâlât ve musâfâtın tezâyüd ve istikrârına bâdî olur ve sâilin istihsâli tarafeynden matlûb ve mültezem olduğundan bu def'a Kırım ve Taman ve Kuban'da tekevvün eden hâlât beyne'd-devleteyn mûris-i kīl ü kāl ve belki mûcib-i infisâh-ı sulh ü salâh olabildiği mülâhaza olduğundan husûs-ı mezbûrun tarafeynden dostâne müzâkeresini işbu iki devlet ihtiyâr ve gereği gibi mütāla'a eylediklerinden sonra beyne'd-devleteyn min-ba'd bir türlü mevâdd-ı bahs-i kīl (91-b) ü kāl kalmamak irâde-i câzimesiyle ba'd-ezîn musâlaha-i kaviyye-i ferhûnde-fâlin ve hüsn-i hem-cıvâreynin ve ticâret-i ma'kūdenin menâfi'iyle tarafeynden temettü' olunmak içün husûs-ı mezbûrun bir râbıta-i kaviyyeye rabtını muktezî gördüklerine binâen işbu iki devlet bu hususu ba'de'l-müzâkere bu senedin tamâmen ve kâmilen ri'âyet ve îfâsını alenen ahd ü peymân ederek akd ve tanzîmini murâd eylediklerinden taraflarından murahhaslar intihâb ve ta'yîn ve yedlerine ruhsat-nâmeler i'tâ ya'ni Devlet-i aliyye-i Osmâniyye tarafından bu niyâz-mendân-ı dergâh-ı ilâh devlet-i kavî-i şevket-vüzerâ ve ulemâ ve ricâli derûnlarında hâlâ bi'l-fi'il deryâ kapudanlığı ve Anadolu kazaskerliği pâyesiyle sâbıkā İstanbul kadılığı ve riyâset-i küttâb hidemât-ı celîle-i refîʿalariyle şeref-yâb olup şehriyâr-ı Dârâ-derbân ve hüsrev-i maʿdelet-nişân dâver-i devrân şehinşâh-ı cihân şevketlû kerâmetlû mehâbetlû adâletlû veli-niʿmetimiz padişahımız efendimiz cânib-i hümâyûnlarından yedlerimize ihsân buyurulan ruhsat-nâme-i sâmiyeleriyle haşmetlû miknetlû bi't-tamâm Rusyaların padişah ve imparatoriçesi cenâbları tarafından Deraliyye'de mukīm fevkalaʿde orta elçisi ve murahhası ve devletinin müsteşarı ve San Viladimir İstanislas tarîkinin kavalyeri rağbetlû menziletlû Bulhakof dahi ruhsat-nâme ile terhîs olunup lâyıkı ve iktizâsı vechile yedlerimize verilen ruhsat-nâmelerimizi beynimizde baʿde'l-mübâdele mevadd-ı âtiyetü'z-zikri imzâ ve temhîr etmişizdir. Evvelki madde: Bin yüz seksensekiz senesinde akd olunan musâlaha ahidnâmesinin ve bin yüz seksendokuz senesinde (92-a) tanzîm olunan hudûdnâmenin ve bin yüz doksanüç senesinde münʿakid olan tenkīh-nâmenin ikinci ve üçüncü ve dördüncü maddeleri istisnâ olunup işbu maddeler baʿd-ezîn devleteynden bir vechile iʿtibâr olunmayup amel olunmaları iktizâ etmeye, lâkin Özi kalʿası kadîmî ülkesiyle Devlet-i aliyye'nin taht-ı tasarrufunda bâkī kala ibâresi bâlâda mastûr seksensekiz senesi ahidnâmesinin zikr olunan üçüncü maddesinde musarrah olmağla ibâre-i mezkûre kemâkân maʿmûlün-bih ve mer'î tutula. İkinci madde: Rusya Devlet-i imparatoriyesi Tatar hânları taraflarından Soğucak kalʿasının nâhiyesi üzerlerine iddiâ olunan mülkiyyet hukūkunu hiçbir vakitde der-meyân ve iddiʿâ eylemeyüp kalʿa-i mezkûre külliyen Devlet-i Osmaniyye'nin mülkü olduğunu iʿtirâf eder. Üçüncü madde: Kuban'da, Kuban nehri hudûd iʿtibâr olunmağla zikr olunan devlet-i imparatoriyye nehr-i mezbûrun beru yakasında yaʿni nehr-i Kuban ve Karadeniz beyninde mütemekkin olan tavâif-i Tatardan dahi keff-i yed eder. İşbu senedin gerek şevketlû kerâmetlû adâletlû merhametlû veli-niʿmetimiz efendimiz padişahımız hazretlerinin taraf-ı hümâyûnlarından ve gerek haşmetlû miknetlû bi't-tamâm Rusyaların padişah ve imparatoriçesi cenâbları tarafından kendü imzâlariyle ve vech-i muʿtâd üzere muharrer alenen tasdîk-nâmeler ile te'yîd ve tasdîk ve zikr olunan tasdîk-nâmeler işbu senedin akdi gününden dört ay zarfında ve mümkin olur ise dahi mukaddem Kostantaniyye'de mübâdele olunmak üzere karar verilüp cânibeyn murahhasları mefâhîm ve mezâmîni (92-b) muvâfık ve mutâbık iki nüshasını tertîb ve terkīm edüp kendü imzâlarımız ve mühürlerimiz ile hatm ve temhîr eyleyüp beynimizde mübâdele eylemişizdir.