Elçi-i mesfûr bu madde içün devleti tarafından ruhsat-nâmesi olduğunu îmâ ve verilecek senedi yâ sadrıazam hazretleri temhîr veyâhud me'mûrlara ruhsat-nâme verilmek istidʿâsında olmağla binâen-aleyh vezîr-i mükerrem kapudan paşa hazretlerine ve İstanbul kadısı sâbık Müftî-zâde Ahmed Efendi'ye ve reisülküttâb efendiye ruhsat-nâme-i hümâyûn verildikden gayrı sûret-i senedin bâlâsına ittifâk-ı ârâ ile karâr bulan işbu sûret mûcibince senedi temhîr ve i'tâ oluna deyû hatt-ı hümâyûn keşîde kılındı. Binâberîn işbu şehr-i Safer'in onbeşinci günü Aynalıkavak sahilsarayında me'mûrlar müctemi' ve hâzır ve kapudan paşa hazretlerinin kudûmuna nâzır olmalarıyla müşârün-ileyh hazretleri yevm-i mezkûrda mu'tellü'l-mizâc ve meşgûl-i tedbîr ve ilâc olduğu ihbâr ve meclise (91-a) gelmeğe iktidarı olmadığı iş'âr olunduğuna binâen sened-i mezkûru mûmâ-ileyhimâ temhîr edüp müşârün-ileyh hazretleri dahi temhîr etmek üzere ruhsat-nâme-i hümâyûn ve sened-i mezbûr beylikci efendi ile irsâl olundukda müşârün-ileyh zikr olunduğu üzere mu'âlece şugliyle haremde olduğu haber verilmekle ruhsat-nâme-i hümâyûn ve sened savb-ı vezîrânelerine gönderilüp der-akab temhîr ve «bu sulh sulh değildir, a'dâ bizim hâlimizi gördükce buna kānî olmayup envâ'-ı teklîfâta âğâz ve memâlik-i mahrûseye dest-î tama'ı dirâz eyleyerek hiç olmadı ise Tuna re's-i hudûd olsun diyecekleri ve başımızın çaresini görmek ve ahz-i intikāma medâr olur esbâb tekmîline bakmak lâzım olup sonra nedâmet fâide vermez» deyû bi'l-vâsıta takrîr ve mûmâ-ileyh dahi senedi alup Aynalıkavak'a geldikde Rusya elçisiyle mübâdele ve şimdilik bu vechile terk-i muhârebe ve mücâdele kılındı.