Kırım ve Kuban maddesiyçün Rusyalu'nun iddiʿâ eyledikleri senedin iʿtâsı ittifâk-ı ârâ ile meclis-i meşveretde karâr-gîr-i nizâm olmakdan nâşî sened-i mezkûrun sûreti olmak üzere Rusya elçisinin arz eylediği kâğıdın mukaddemesi taʿbîrât-ı gayr-i müstaʿmele ve kelimât-ı bâride ve mühmele ile muhbat ve müşevveş olduğundan gayri Aynalı-kavak tenkîh-nâmesinin Tatara müte'allik olan ikinci ve üçüncü ve dördüncü maddeleri ve Kaynarca ahid-nâmesinin üçüncü maddesi ilgā olunmak elçi-i mersûmun kâğıdında münderic olup Kaynarca'nın üçüncü maddesi ise Özi kal'ası kadîmî ülkesiyle ke'l-evvel Devlet-i aliyye nin tasarrufunda bâkī kala şartından ibâret olup ilgā olunduğu takdirde bir aralıkda madde-i ilgāyı der-meyân ve Özi'yi mülhakātıyle ahden iddiâ eylecekleri nümâyân zikr olunan elfâz-ı mübheme ve gayr-i müstakîmenin tağyîri ve ale'l-husûs Devlet-i aliyye'ye mazarratı bedîhî olan (87-b) madde-i selâse-i mezkûrenin îzâh ve tebyîni Rusya tercümânı vâsıtasıyle elçiye ifhâm olundukda tağyîr-i üslûb ve tenkīh-i sûret-i matlûb uhdesinden hâric olduğun ifâde ve devletinin madde-i ilgādan murâd-ı âharı olmadığını beyân ile tercümânını i'âde ve'l-hâsıl birkaç def'a muhâbere ve madde-i mezkûrenin keşf ü îzâhı husûsunda bi'l-vâsıta azîm muhâvereden sonra güc ile mesfûr ilzâm ve üçüncü maddede musarrah olan Özi ibâresi ibkāsıyle böyle bir emr-i mevhûm ve vaktiyle da'vâya sâlih bir kayd-ı dakīkü'l-mefhûm izâlesine ihtimâm olundu.