Kalyoncu zümresine muhtass (66-b) olarak bundan akdem binâ ve inşâ olunan kışlağların seyr ü temâşâsı zımnında İngiltere elçisi gelüp kapudan-ı deryâ vezîr-i mükerrem Gazi Hasan Paşa hazretleriyle mahall-i mezkûrda mülâkî ve icrâ-yi resm akabinde elçi-i mersûm kelâma ibtidâr ve Hazret-i Ömer radiyallahü te'âlâ anh hazretlerinin zamân-ı hilâfetlerinden berü düvel-i islâmiyye ile safvet üzere oldukların iş'âr ve bâ-husûs Devlet-i aliyye-i ebediyyü'l-karâr ile müddet-i medîdeden berü mu'âhede ve muhâdeneleri pâydâr olduğundan bahs ve Rusya elçisinin bu def'a takrîr takdîmiyle devleti tarafından vâki' olan istid'âsına müsâ'ade Devlet-i aliyye'ye hayırlu olduğun ifâde ve mesfûrların hudûd başlarında ve Bahreyn'de asâkir ve donanmaları âmâde olup takrîrlerine redd ile cevâb verildiği takdîrde muhârebeyi ihtiyâr ve müttefiki ile ma'an memâlik-i islâmiyyeye hücûm edecekleri bedîdâr olup ikisinin birden def'i müşkil ve düşvâr olacağı ve bâb-ı muhârebe küşâde oldukdan sonra nizâm irâde olunduğu takdîrde Rusyalu matlûbât-ı sâ'iresine kanâ'at etmeyüp âhar teklîf irâde ve Nemçelü dahi ittihâd iktizâsıyla merâmını ibrâz eyleyeceği ba'îd mülâhaza değildir. Ve el-hâletü hâzihi İngilterelü'nün tavassutu dahi mücerred devlet-i ebed-müddet ile olan kıdem-i dostî ve safvetin lâyıkını icrâya mebnî ve her türlü Devlet-i aliyye'ye hayırlu olmak mülâhazasına mübtenîdir. Binâen-aleyh istid'âsına müsâ'ade der-kâr ve devletimizin tavassutu dahi ihtiyâr olunur ise ba'de'n-nizâm Nemçe Devleti tarafından (67-a) bir nesne teklîf ve mutâlebe olunmayacağına ve Şâhin Giray'ın Kuban'ın berü cânibinde olan Tatar ve Çerâkise ve Abaza ve Soğucak ve ol havâliye melhûz olan dest-dirâzlığı vukū'unda Rusyalu'dan vechen mine'l-vücûh mu'âvenet olunmayacağından gayri men' ve def' olunacağına devletimiz dahi ta'ahhüd ve tavassut eder ve bu vechile nizâ- mın zamânı şimdi olup bir müddet mürûr eder ise Nemçelü tedârükât husûsunda şu kadar masârifim oldu deyü iddiʿâ-yı zamân ve dahi âhar gûne matâlibe ağâz eyleyeceği nümâyândır. Murâdım ancak dostluk levâzımını işʿâr ve fukarânın pâ-zede-i mazarrat olmamasını ihtârdır. Kaldı ki bundan sonra Devlet-i aliyye her türlü levâzımât ve tedârükâtını maʿa-ziyâdetin âmâde ve her taraf ile mukāvemet istiʿdâdını kesb akabinde Mora cezîresinin tahlîsi gibi Devlet-i aliyye murâdını kuvvetden fiʿile getirmek mümkindir deyû hatm-i kelâm eylediği müşârün-ileyh hazretleri tarafından Bâbıâlî'ye takdîm olundu. Mesfûrun takrîri her çend mizâc-ı vakt ü zamâna muvâfık ise dahi Rusyalu'nun tahsîl-i ağrazında saʿy ü ciddi ber-kemâl ve birer bahâne ile sâmiʿa-i devleti tahdîşde sanâyiʿ-i mekr ü fîrib iʿmâl eylediğinden gayri Devlet-i aliyye muhârebeyi ihtiyâr etmeksizin Kırım'ı Rusyalu terk eyleyeceğine devleti taʿahhüd ve sened iʿtâ eylediği dahi mesmûʿ olmuşdur.